Xalqaro tanlovlar g‘oliblariga 300 million so‘mgacha mukofot beriladi
Har yili 100 nafar iqtidorli yosh xorijda davlat hisobidan o‘qitiladi.
Prezident Shavkat Mirziyoyevning adabiyot, madaniyat va san’at sohasi vakillari bilan uchrashuvida yosh iste’dodlarni qo‘llab-quvvatlash hamda sohani rivojlantirishga qaratilgan qator yangi tashabbuslar e’lon qilindi.
Qayd etilishicha, 2026-yil 1-sentabrdan boshlab respublika miqyosidagi tanlovlar g‘oliblari 100 million so‘m miqdoridagi pul mukofoti bilan taqdirlanadi. Nufuzli xalqaro tanlovlarda g‘olib va sovrindor bo‘lgan yoshlar esa 300 million so‘mgacha mukofot oladi.
Shuningdek, yoshlarning xalqaro tanlovlarda ishtirok etishi bilan bog‘liq barcha xarajatlar davlat tomonidan to‘liq qoplab beriladi.
Yangi tartibga ko‘ra, iqtidorli yoshlarni tayyorlagan ustoz va murabbiylarning oylik ish haqiga 100 foizgacha ustama to‘lanadi. Mazkur imtiyozlar davlat muassasalari bilan bir qatorda xususiy ijodiy jamoalar va nodavlat madaniyat tashkilotlariga ham tatbiq etiladi.
Uchrashuvda kadrlar tayyorlash masalasiga ham alohida e’tibor qaratildi. Endilikda har yili 100 nafar iqtidorli yosh davlat hisobidan xorijdagi nufuzli madaniyat va san’at ta’lim muassasalariga o‘qishga yuboriladi.
Bundan tashqari, yosh iste’dodlarni kashf etish, prodyuserlik faoliyatini rivojlantirish va ijodiy loyihalarni moliyalashtirish maqsadida “Ijodga investitsiya” jamg‘armasi tashkil etiladi. Jamg‘arma faoliyati uchun har yili 200 milliard so‘m mablag‘ ajratilishi belgilandi.
