Yangi o‘quv yilidan 326 ta san’at maktablari pedagoglari umumta’lim maktablari bilan teng maosh oladi
O‘quvchilar yutuqlariga qarab pedagoglarga 20 foizgacha ustama to‘lanadi.
Prezident Shavkat Mirziyoyevning madaniyat va san’at sohasi vakillari bilan uchrashuvida musiqa va san’at ta’limini rivojlantirish hamda iqtidorli yoshlarni qo‘llab-quvvatlashga qaratilgan yangi tashabbuslar e’lon qilindi.
Qayd etilishicha, yangi o‘quv yilidan boshlab respublikadagi 326 ta musiqa va san’at maktabi o‘qituvchilarining ish haqi umumta’lim maktablari pedagoglari bilan tenglashtiriladi.
Shuningdek, umumta’lim va musiqa maktablari o‘qituvchilariga o‘quvchilarning musiqa asboblarini ijro etish mahoratidan kelib chiqib, ish haqiga 20 foizgacha ustama to‘lash tizimi joriy etiladi.
Yangi o‘quv yilida kamida 1,5 million nafar o‘quvchini musiqa va san’atga jalb qilish vazifasi belgilandi. Shu maqsadda 326 ta musiqa va san’at maktabi hamda 29 ta ixtisoslashtirilgan maktab bilan umumta’lim muassasalari o‘rtasida ijodiy hamkorlik yo‘lga qo‘yiladi.
Bundan tashqari, har yili teatr, cholg‘u, xor va raqs yo‘nalishlari bo‘yicha umumta’lim maktablari o‘rtasida tuman, viloyat va respublika bosqichlarida tanlovlar o‘tkaziladi. Ushbu tanlovlar g‘oliblarini qo‘llab-quvvatlash, sahna dekoratsiyalari, liboslar va musiqa asboblari xarid qilish uchun 500 million so‘mgacha grant mablag‘lari ajratiladi.
Shuningdek, respublika tanlovlari g‘oliblariga madaniyat va san’at yo‘nalishidagi oliy ta’lim muassasalariga o‘qishga kirishda alohida imkoniyatlar yaratiladi hamda ular oliygohlarga qabul qilinadi.
