AQSH boshpana so'rash arizalarini ko'rib chiqish tartibini kuchaytirmoqda
Hozirda 1 milliondan ortiq ko‘rib chiqilmagan boshpana arizalari mavjud bo‘lib, yangi tartib orqali hukumat jarayonni tezlashtirishni maqsad qilgan.
AQSh ma’muriyati boshpana so‘rab murojaat qiluvchilarga nisbatan qo‘llaniladigan tartiblarni yanada qat’iylashtirishni rejalashtirmoqda. Bu haqda CBS telekanali xabar berdi.
Ma’lumotlarga ko‘ra, ishlab chiqilayotgan yangi qoidalarga binoan AQSh Fuqarolik va immigratsiya xizmatlari (USCIS) xodimlari ayrim boshpana arizalarini ariza beruvchi bilan alohida suhbat o‘tkazmasdan rad etish huquqiga ega bo‘lishi mumkin.
Loyihada qayd etilishicha, agar chet el fuqarosi mamlakat hududiga kirganidan keyin bir yildan ortiq vaqt o‘tgach boshpana so‘rab murojaat qilsa va qonunchilikda nazarda tutilgan istisno holatlarni tasdiqlovchi hujjatlarni taqdim etmasa, uning arizasi rad etilishi mumkin.
Bunday hollarda murojaatchilar immigratsiya sudiga yuboriladi va ularning ishi deportatsiya jarayonlari doirasida ko‘rib chiqiladi.
AQSh rasmiylarining ta’kidlashicha, mazkur tashabbus immigratsiya tizimidagi ortiqcha yuklamani kamaytirish hamda ko‘rib chiqilishi kutilayotgan arizalar sonini qisqartirishga qaratilgan. Hozirda mamlakatda 1 milliondan ortiq boshpana arizasi navbatda qolmoqda.
Mutaxassislar fikricha, yangi qoidalar qabul qilinsa, boshpana olish jarayoniga qo‘yiladigan talablar sezilarli darajada kuchayishi va immigratsiya tizimining ishlash tartibiga jiddiy ta’sir ko‘rsatishi mumkin.
