BMT bankrotlik yoqasida, mablag‘lar avgustda tugashi mumkin — WSJ
AQSh va Xitoy tomonidan badal to‘lovlarining kechiktirilishi sababli BMT jiddiy moliyaviy inqirozga duch kelgan.
Birlashgan Millatlar Tashkiloti (BMT) AQSh va Xitoy tomonidan majburiy badal to‘lovlarining kechiktirilishi fonida jiddiy moliyaviy qiyinchiliklarga duch kelmoqda. Bu haqda The Wall Street Journal nashri xabar berdi.
Ma’lumotlarga ko‘ra, AQSh va Xitoy hissasi BMT umumiy byudjeti daromadlarining qariyb 42 foizini tashkil etadi. Hozirda AQShning tashkilot oldidagi qarzi 4 milliard dollardan oshgan bo‘lsa, Xitoy may oyida 850 million dollar to‘laganiga qaramay, yana 455 million dollar qarzdor bo‘lib qolmoqda.
Nashrning yozishicha, moliyalashtirishdagi uzilishlar sabab BMT xarajatlarni keskin qisqartirish choralarini ko‘rmoqda. Xususan, tashkilot kotibiyatidagi 3 mingga yaqin lavozim qisqartirilgan, ayrim ofislar yopilgan hamda bir qator ma’muriy xarajatlar kamaytirilgan.
Shuningdek, Buyuk Britaniya, Germaniya, Shvetsiya va Niderlandiya kabi yirik donor davlatlar ham xalqaro gumanitar dasturlarga ajratilayotgan mablag‘larni qisqartirgani qayd etilgan.
BMT Bosh kotibi Antonio Guterrish avvalroq tashkilot “moliyaviy qulashning real xavfi”ga duch kelayotganini ta’kidlagan edi. Prognozlarga ko‘ra, mavjud mablag‘lar avgust oyining o‘rtalariga qadar yetishi mumkin.
Moliyaviy tanqislik fonida BMT tinchlikparvarlik operatsiyalariga sarflanayotgan xarajatlarni kamaytirish, ayrim missiyalar faoliyatini qayta ko‘rib chiqish va qo‘shin yuboruvchi davlatlarga to‘lovlarni kechiktirishga ham majbur bo‘lmoqda.
