“Bolalar — jamiyatimizning eng qimmatli boyligi” — Ziroat Mirziyoyeva
O‘zbekiston Birinchi xonimi Xalqaro bolalarni himoya qilish kuni munosabati bilan bolalarni tabriklab, ularning baxtli va xavfsiz hayot kechirishi eng ustuvor vazifa ekanini ta’kidladi.
O‘zbekiston Birinchi xonimi, “Zamin” xalqaro jamoat fondi Vasiylik kengashi raisi Ziroat Mirziyoyeva 1-iyun — Xalqaro bolalarni himoya qilish kuni munosabati bilan bolalarga bayram tabrigini yo‘lladi.
Ziroat Mirziyoyeva o‘zining Telegram sahifasida e’lon qilgan murojaatida bolalarni jamiyatning eng qimmatli boyligi sifatida e’tirof etib, ularning baxtli va farovon kelajagini ta’minlash har bir davlat va jamiyatning ustuvor vazifasi ekanini ta’kidlagan.
Birinchi xonimning qayd etishicha, har bir bola tinchlik, mehr-muhabbat va g‘amxo‘rlik muhitida ulg‘ayishi, sifatli ta’lim olish imkoniyatiga ega bo‘lishi hamda davlat va jamiyat tomonidan ko‘rsatilayotgan e’tibor va qo‘llab-quvvatlashni his etishi lozim.
Shuningdek, u bolalarning huquq va manfaatlarini himoya qilish, ular uchun teng imkoniyatlar yaratish hamda rivojlanish yo‘lidagi barcha to‘siqlarni bartaraf etish muhim ahamiyat kasb etishini qayd etgan.
