“Boshlang‘ich ta’lim ona tilida bo‘lishi kerak” — Alisher Qodirov

 

Alisher Qodirov maktabgacha tayyorlov kurslari hamda maktabning boshlang‘ich sinflarida ta’limni ona tilidan boshqa tilda olib borish masalasiga munosabat bildirdi. Bu haqda u o‘zining ijtimoiy tarmoqlardagi sahifasida yozgan.

 

Uning ta’kidlashicha, boshlang‘ich ta’lim bosqichida ona tilidan boshqa tilda o‘qitish bolalar manfaatiga zid bo‘lib, bu holatni pedagogik xato hamda milliy o‘zlikka ta’sir qiluvchi omil sifatida baholash mumkin. 

 

Qodirovning qayd etishicha, amaldagi tartibga ko‘ra ota-onalar ta’lim tilini tanlash huquqiga ega bo‘lsa-da, ayrim hollarda bu bolalarning boshlang‘ich ta’limni o‘z ona tilida olish imkoniyatini cheklamoqda.

 

Shuningdek, u boshlang‘ich ta’limda boshqa tilda o‘qigan bolalarda keyingi bosqichlarda o‘quv jarayonini davom ettirishda qiyinchiliklar yuzaga kelishi, bu esa bilimlarni o‘zlashtirish darajasiga salbiy ta’sir ko‘rsatishi mumkinligini ta’kidlagan.

 

Qodirovning fikricha, boshlang‘ich ta’lim va tayyorlov kurslari to‘liq ona tilida tashkil etilishi zarur. U bu masalani qonunchilik darajasida tartibga solish va Ta’lim to‘g‘risidagi qonunga tegishli o‘zgartirishlar kiritish lozimligini qayd etdi.

 

“Boshqa millatli vatandoshlarimizga talab bilan shu sharoitni yaratib berish kerak. Boshqa millatli vatandoshlarimiz agar boshlangʻich ta’limni oʻzim ona tilimda olaman desa, nur ustiga a’lo nur” — deya ta'kidlagan Qodirov.