O‘zbekistonlik bolalar futbol bo‘yicha jahon chempioni bo‘ldi
Toshkent shahridagi 22-sonli mehribonlik uyi tarbiyalanuvchilari dunyoning 35 ta jamoasi ishtirok etgan nufuzli musobaqada ishtirok etib, g‘alaba bilan qaytishdi.
Bugun, 2-iyun kuni Islom Karimov nomidagi Toshkent xalqaro ayeroportida Polsha shahrida o‘tkazilgan futbol musobaqasida g‘alaba qozonib, jahon chempioni bo‘lib qaytgan bolalar tantanali ravishda kutib olindi. Bu haqida tadbirda ishtirok etgan Zamon.uz muxbiri xabar bermoqda.
Ma’lumotlarga ko‘ra, Polsha Respublikasining Varshava shahrida Mehribonlik uylari tarbiyalanuvchilari o‘rtasida o‘tkazilgan futbol bo‘yicha XI jahon chempionatida O‘zbekiston jamoasi ulkan g‘alabaga erishgan.
Toshkent shahar 22-son Mehribonlik uyi tarbiyalanuvchilaridan tashkil topgan jamoa dunyoning 35 ta jamoasi ishtirok etgan nufuzli musobaqada munosib ishtirok etgan.
Futbolchilar 7 ta uchrashuvda g‘alaba qozonib, final bosqichiga yo‘l oldi va hal qiluvchi bahsda ham zafar quchib, jahon chempioni degan sharafli nomga sazovor bo‘lgan.
Natijada O‘zbekiston jamoasi Mehribonlik uylari tarbiyalanuvchilari o‘rtasidagi futbol bo‘yicha XI jahon chempionatining mutlaq g‘olibiga aylangan.
Bugun erta tongda Ijtimoiy himoya milliy agentligi hamda hamkor tashkilotlar vakillari tomonidan chempion sportchilar Toshkent shahridagi Islom Karimov nomidagi Toshkent xalqaro ayeroportida tantanali ravishda kutib olindi.
Kutib olish marosimi davomida sportchilarga Ijtimoiy himoya milliy agentligining esdalik sovg‘alari topshirildi hamda ularning erishgan yuksak natijalari munosib e’tirof etildi.
