Prezident kimyo sanoati korxonalari faoliyatini tanqid qildi
Davlat rahbari kimyo sanoati o‘sish sur’atlari mamlakat sanoatidagi umumiy ko‘rsatkichlardan ancha past ekanini qayd etdi.
Shavkat Mirziyoyev raisligida o‘tkazilgan kimyo sanoatini rivojlantirishga bag‘ishlangan videoselektor yig‘ilishida tarmoqdagi mavjud muammolar va foydalanilmayotgan imkoniyatlar tanqidiy tahlil qilindi.
Yig‘ilishda qayd etilishicha, so‘nggi to‘qqiz yil davomida mamlakat sanoati o‘rtacha 6,3 foizga o‘sgan bo‘lsa, kimyo sanoatidagi o‘sish sur’ati 3 foizga ham yetmagan. Shu bilan birga, kimyo mahsulotlari importi yiliga 4,5 milliard dollarga yetgani ta’kidlandi.
Davlat rahbari mahalliy korxonalar tomonidan ishlab chiqarilayotgan kimyo mahsulotlari ichki talabning hatto 60 foizini ham qoplay olmayotganini qayd etdi. Shuningdek, mavjud ishlab chiqarish salohiyatidan yetarli darajada foydalanilmayotgani, tarmoqda bir ishchiga to‘g‘ri keladigan qo‘shilgan qiymat boshqa davlatlarga nisbatan 2–3 barobar pastligi ko‘rsatib o‘tildi.
Yig‘ilish davomida “O‘zkimyosanoat” aksiyadorlik jamiyati faoliyati ham tanqid qilindi. Xususan, kompaniya asosan o‘z tizimidagi yirik korxonalar bilan ishlayotgani, sohada faoliyat yuritayotgan 5 mingdan ortiq korxona bilan tizimli hamkorlik yo‘lga qo‘yilmagani, ularning muammo va takliflarini o‘rganish jarayoni sustligi qayd etildi.
Shu munosabat bilan davlat rahbari kimyo sanoati korxonalari vakillari bilan shaxsan uchrashib, sohadagi dolzarb masalalar, tadbirkorlarni qiynayotgan muammolar hamda istiqboldagi rivojlanish yo‘nalishlarini muhokama qilishga qaror qilganini ma’lum qildi.
