Samarqandda MIB orqali 4 oyda 2,5 mingta oila yarashtirildi
Shuningdek, 17 196 nafar aliment to‘lovchining bandligi ta’minlandi.
Majburiy ijro byurosi organlari faoliyati faqat qarzdorlikni undirish bilan cheklanmaydi. Byuro tizimida, avvalo, insoniylik tamoyillariga tayanilgan holda oilalarni saqlab qolish, farzandlar manfaatini himoya qilish va ajrimlarning oldini olishga alohida e’tibor qaratiladi.
Shu maqsadda Majburiy ijro byurosi Samarqand viloyat boshqarmasi organlari tomonidan 2026 yilning o‘tgan 4 oyi davomida oilalarni yarashtirishga qaratilgan profilaktik suhbatlar va tushuntirish ishlari olib borildi. Natijada 2 524 ta oila yarashtirildi.
Shuningdek, aliment to‘lovchilarning bandligini ta’minlash maqsadida tuman (shahar) Bandlikka ko‘maklashish markazlari hamda boshqa mutasaddi idoralar bilan hamkorlikda manzilli chora-tadbirlar amalga oshirildi.
Olib borilgan ishlar samarasida jami 29 525 ta ijro ishi bo‘yicha aliment to‘lovchilarning 17 196 nafari bandligi ta’minlandi.
Bu kabi chora-tadbirlar oilalar mustahkamligini ta’minlash, aliment qarzdorligini kamaytirish hamda farzandlar ta’minotini yaxshilashga xizmat qilmoqda.
