“Ketingni tozalab yuribman” — Tramp Netanyahuni haqorat qildi
AQSH prezidenti Isroil bosh vazirini Livandagi harbiy amaliyotlar sabab tanqid qilib, bunday harakatlar keskinlikni kamaytirishga qaratilgan urinishlarga zarar yetkazayotganini ta’kidladi.
AQSH prezidenti Donald Tramp Isroil bosh vaziri Benyamin Netanyaxuni Livandagi harbiy amaliyotlar sabab keskin tanqid qildi. Bu haqda Axios nashri AQSH ma’muriyatidagi manbalarga tayanib xabar berdi.
Nashr ma’lumotlariga ko‘ra, ikki davlat rahbari o‘rtasidagi telefon suhbati davomida Tramp Netanyaxuning Livanga berilgan zarbalar bo‘yicha qarorlaridan noroziligini bildirgan. Xususan, AQSH prezidenti Isroil bosh vazirining harakatlari mintaqadagi vaziyatni yanada keskinlashtirayotgani va diplomatik sa’y-harakatlarga putur yetkazayotganini ta’kidlagan.
Axios manbalariga ko‘ra, suhbat chog‘ida Tramp Netanyaxuni keskin ohangda tanqid qilib, uni “aqldan ozgan” deb atagan. Shuningdek, u Isroil rahbariga qarata uning xalqaro maydondagi obro‘si pasayib borayotgani va bu holat Isroilning yanada kuchli diplomatik yakkalanishiga olib kelishi mumkinligini aytgan.
“Sen aqldan ozgansan. Men bo‘lmaganimda qamoqda o‘tirarding. Hozir esa seni hamma yomon ko‘rib qoldi. Shu ishlaring tufayli Isroilga nisbatan salbiy munosabat kuchaymoqda”, degani keltirilmoqda.
Ma’lumotlarga ko‘ra, Tramp ayniqsa Livandagi harbiy amaliyotlar oqibatida tinch aholi orasida qurbonlar soni ortayotgani va Hizbulloh qo‘mondonlariga qarshi operatsiyalar davomida turar joy binolari vayron qilinayotganidan xavotir bildirgan.
1-iyun kuni Isroil Bayrut janubidagi ayrim hududlarga havo zarbalari bergan edi. Tel-Aviv bu amaliyotlarni Eron tomonidan qo‘llab-quvvatlanadigan Hizbulloh harakatiga qarshi xavfsizlik chorasi sifatida izohladi. Bundan avval esa Isroil Livan hududidagi quruqlikdagi operatsiyalar ko‘lamini kengaytirganini e’lon qilgandi.
Telefon suhbatidan so‘ng Donald Tramp o‘zining Truth Social sahifasida Isroil va Hizbulloh o‘rtasida otashkesim bo‘yicha kelishuvga erishilganini ma’lum qildi. Uning so‘zlariga ko‘ra, Netanyaxu bilan o‘tkazilgan muloqot “juda samarali” bo‘lgan.
AQSH prezidenti Bayrut tomon harakatlanayotgan Isroil bo‘linmalari ortga qaytarilganini hamda Hizbulloh vakillari bilan olib borilgan muzokaralar natijasida tomonlar o‘t ochishni to‘xtatishga rozi bo‘lganini ta’kidladi.
“Men Bibi Netanyaxu bilan juda samarali suhbatlashdim. Bayrutga qo‘shin yuborilmaydi. Harakatlanayotgan bo‘linmalar ortga qaytarildi. Shuningdek, Hizbulloh vakillari bilan ham muloqot qilindi va ular barcha harbiy harakatlarni to‘xtatishga rozi bo‘ldi. Isroil ularga hujum qilmaydi, ular ham Isroilga hujum qilmaydi”, deb yozgan Tramp.
