Surxondaryodagi suv omborida qayiq ag‘darilib, bir kishi cho‘kib ketdi
Qayiqdagi 5 nafar fuqarodan 4 nafari qirg‘oqqa suzib chiqqan.
Surxondaryo viloyatining Qumqo‘rg‘on tumanida joylashgan Janubiy Surxon suv omborida qayiq ag‘darilib ketishi oqibatida bir kishi suvda bedarak yo‘qolgan. Bu haqda viloyat Favqulodda vaziyatlar boshqarmasi xabar berdi.
Ma’lum qilinishicha, 2026-yil 1-iyun kuni soat 17:30 larda Surxondaryo viloyati FVBga Qumqo‘rg‘on tumanida joylashgan Janubiy Surxon suv omborida qayiq ag‘darilib ketgani haqida xabar kelib tushgan.
Voqea joyiga yetib borgan qutqaruvchilar qayiqdagi 5 nafar fuqarodan 4 nafari qirg‘oqqa suzib chiqqanini aniqlagan, 1 nafari esa suvdan chiqolmay qolib cho‘kib ketganligi ma’lum bo‘lgan.
Hozirda Favqulodda vaziyatlar boshqarmasi qutqaruvchilari tomonidan suv havzasida keng ko‘lamli qidiruv-qutqaruv ishlari olib borilmoqda.
Hodisa yuzasidan Qumqo‘rg‘on tumani prokuraturasi, ichki ishlar va favqulodda vaziyatlar organlari xodimlari tomonidan holatning kelib chiqish sabablari o‘rganilmoqda.
