Termizda bankomatlar yonib ketdi
Yong‘inning kelib chiqish sabablari hamda yetkazilgan moddiy zarar miqdori aniqlanmoqda.
Surxondaryo viloyatining Termiz shahrida uchta bankomatda yong‘in sodir bo‘ldi. Bu haqda Surxondaryo FVB xabar berdi.
Ma’lumotlarga ko‘ra, hodisa 2-iyun kuni soat 04:14 da Termiz shahrining “Do‘stlik” mahallasida joylashgan Biznesni rivojlantirish banki Termiz bank xizmatlari ofisiga qarashli uchta bankomatda yuz bergan.
Xabar kelib tushgach, yong‘in joyiga qutqaruv bo‘linmasining bir ekipaji jalb etilgan. Yong‘in soat 04:20 da qurshab olinib, 04:28 da to‘liq bartaraf etilgan.
Hodisa oqibatida jabrlanganlar qayd etilmagan. Hozirda yong‘inning kelib chiqish sabablari hamda yetkazilgan moddiy zarar miqdori aniqlanmoqda.
