Xalqaro tashkilotlardagi o‘zbekistonliklar mamlakat nufuzini yuksaltirmoqda — Saida Mirziyoyeva
Prezident administratsiyasi rahbari Venada xalqaro tashkilotlarda ishlayotgan vatandoshlar bilan uchrashdi.
Vena shahriga tashrifi doirasida Saida Mirziyoyeva xalqaro tashkilotlarda faoliyat yuritayotgan vatandoshlar bilan uchrashdi.
Muloqot chog‘ida xorijda mehnat qilayotgan o‘zbekistonlik mutaxassislarning xalqaro maydondagi faoliyati, ularning professional yutuqlari hamda mamlakat nufuzini mustahkamlashga qo‘shayotgan hissasi alohida e’tirof etildi.
Ta’kidlanganidek, vatandoshlar o‘z bilim va tajribasi, yuksak mas’uliyati hamda fidokorona mehnati bilan O‘zbekistonga bo‘lgan ishonchni mustahkamlab, xalqaro hamjamiyatda mamlakatimizning munosib vakili sifatida faoliyat yuritmoqda.
Uchrashuvda, shuningdek, xorijda yashab va ishlayotgan bo‘lishiga qaramay, yurtdoshlarning Vatan bilan mustahkam aloqalarni saqlab qolayotgani, mamlakat taraqqiyoti va xalqaro hamkorlikni rivojlantirish jarayonlarida faol ishtirok etayotgani yuqori baholandi.
Muloqot davomida xalqaro tashkilotlarda faoliyat yuritayotgan o‘zbekistonlik mutaxassislar safini kengaytirish, yoshlarni global tajriba orttirishga rag‘batlantirish va ularning professional rivojlanishini qo‘llab-quvvatlash masalalariga alohida e’tibor qaratildi.
Qayd etilganidek, xalqaro maydonda muvaffaqiyat qozonayotgan, bilim va salohiyatini Vatan ravnaqi hamda global taraqqiyot yo‘lida safarbar etayotgan yoshlarni qo‘llab-quvvatlash bundan buyon ham ustuvor yo‘nalishlardan biri bo‘lib qoladi.
