O‘zbekiston Afg‘onistonga 40 tonna qishloq xo‘jaligi urug‘liklarini yetkazib berdi
Shuningdek, 500 kilogramm sabzavot hamda poliz ekinlari urug‘liklari topshirilgan.
O‘zbekiston Qishloq xo‘jaligi vazirligi huzuridagi Urug‘chilikni rivojlantirish markazi tomonidan Afg‘oniston fermerlari va agrar tuzilmalariga beg‘araz yordam tariqasida qishloq xo‘jaligi ekinlari urug‘liklari yetkazib berildi. Bu haqda Qishloq xo‘jaligi vazirli xabar berdi.
Yordam doirasida ob-havo sharoitlariga moslashgan va sertifikatlangan 20 tonna chigit hamda 20 tonna sholi urug‘ligi, shuningdek, 500 kilogramm sabzavot va poliz ekinlarining yuqori sifatli, saralangan urug‘lari topshirilgan.
Mutaxassislar ushbu amaliy yordam Afg‘onistonda oziq-ovqat xavfsizligini mustahkamlash, qishloq joylarda aholi bandligini oshirish hamda zamonaviy agrotexnologiyalarni joriy etishga xizmat qilishini ta’kidlashmoqda.
Qayd etilishicha, O‘zbekiston va Afg‘oniston o‘rtasidagi agrar hamkorlik izchil rivojlanib, mintaqaviy barqarorlik, oziq-ovqat xavfsizligi va iqtisodiy taraqqiyotni ta’minlashga munosib hissa qo‘shmoqda.
