O‘zbekistonning xalqaro nufuzi yana bir pog‘onaga ko‘tarildi
“Fitch” xalqaro reyting agentligi O‘zbekistonning suveren kredit reytingi prognozini “barqaror”dan “ijobiy”ga yaxshiladi.
Fitch Ratings O‘zbekistonning suveren kredit reytingi prognozini “Stable" - barqaror darajasidan “Positive" - ijobiy darajaga o‘zgartirilganini ma’lum qildi.
O‘zbekiston Respublikasi Prezidenti Administratsiyasi rahbari Saida Mirziyoyeva: "Bu xalqaro investorlar tomonidan mamlakatimizga bildirilgan yuksak ishonch belgisidir", - deya ta’kidladi.
Bu nimani anglatadi?
Bu xalqaro reyting agentligi mamlakat iqtisodiyotida amalga oshirilayotgan islohotlar izchil davom etayotgani va kelgusida reytingning yanada yaxshilanishi uchun real asoslar mavjudligini tan olganini anglatadi.
Bu o‘zgarish mamlakat uchun amaliy jihatdan ham katta ahamiyat kasb etadi. Chunki xalqaro investorlar va moliya institutlari reytingning o‘zigagina emas, balki uning kelajakdagi yo‘nalishiga ham katta e’tibor qaratadi.
Hozirgi zamonda dunyo bo‘ylab sodir bo‘layotgan turli notinchliklar va iqtisodiy qiyinchiliklarga qaramay Yangi O‘zbekistonda olib borilayotgan islohotlarning amaliy natijasi va mamlakat iqtisodiyotining tobora barqaror hamda raqobatbardosh bo‘lib borayotganining yana bir yorqin isbotidir.
