Transchegaraviy katta narkoguruh ushlandi
Guruh Tojikistondan Qirg‘iziston orqali O‘zbekistonga giyohvand moddalar yetkazib berish bilan shug‘ullangan.
Qirg‘iziston Ichki ishlar vazirligining Giyohvand moddalar savdosiga qarshi kurashish xizmati O‘zbekiston va Tojikiston huquqni muhofaza qiluvchi organlari bilan hamkorlikda transmilliy narkotrafik faoliyatini fosh etdi. Bu haqda Kabar.kg nashri xabar berdi.
Maxsus operatsiya davomida Afg‘onistondan Qirg‘iziston orqali kelib, O‘zbekistonga tranzit yo‘li bilan yetkazib berilgan katta miqdordagi giyohvand moddalar kanali yo‘q qilingan.
Tergov ma’lumotlariga ko‘ra, 1964-yilda tug‘ilgan, ilgari bir necha marotaba jinoiy javobgarlikka tortilgan xorij fuqarosi ushlangan. Uning yonidan 51 kilogramm miqdoridagi afg‘on gashishi topilgan.
Aniqlanishicha, qo‘lga olingan shaxs Tojikistondan Qirg‘iziston hududi orqali giyohvand moddalarni kontrabanda yo‘li bilan olib o‘tib, keyinchalik O‘zbekiston hududiga yetkazib berish bilan shug‘ullangan jinoiy guruh tashkilotchisi bo‘lgan.
Hozirda jinoiy sxemaning boshqa ishtirokchilarini aniqlash, giyohvand moddalar yetkazib berish kanallarini fosh etish bo‘yicha tergov va tezkor-qidiruv harakatlari davom etmoqda.
