180 mamlakat vakillari Samarqanddagi ekologik forumda jam bo‘ldi
Saida Mirziyoyeva Samarqandda GEF 8-Assambleyasi ishtirokchilariga Prezident tabrigini o‘qib eshittirdi.
Samarqandda o‘z ishini boshlagan Global ekologik jamg‘armaning (GEF) 8-Assambleyasi doirasida Saida Mirziyoyeva Prezident Shavkat Mirziyoyevning tabrigini forum ishtirokchilariga o‘qib eshittirdi.
Ta’kidlanishicha, nufuzli xalqaro anjuman Markaziy Osiyo va butun dunyo uchun dolzarb bo‘lib qolayotgan iqlim o‘zgarishi hamda ekologik muammolar yuzasidan ochiq muloqot va amaliy yechimlarni muhokama qilish uchun muhim maydon vazifasini o‘tamoqda.
Saida Mirziyoyevaning qayd etishicha, mazkur tadbir O‘zbekistonning global ekologik kun tartibidagi o‘rni va nufuzi tobora ortib borayotganini yana bir bor namoyon etdi.
Assambleya doirasida tashkil etilgan “Eco Expo Central Asia–2026” ko‘rgazmasida “yashil” iqtisodiyot va ekologik loyihalarni qo‘llab-quvvatlash maqsadida 80 million dollarlik grantlar hamda 520 million dollardan ortiq investitsiyalarni jalb etish bo‘yicha kelishuvlar imzolandi.
Qayd etilishicha, endilikda asosiy vazifa ushbu tashabbus va loyihalarni amaliyotga samarali tatbiq etish, ekologik barqarorlikni ta’minlash hamda atrof-muhitni asrashga qaratilgan sa’y-harakatlarni yanada kuchaytirishdan iborat.
Ayni paytda Global ekologik jamg‘armaning 8-Assambleyasi va “Eco Expo Central Asia–2026” tadbirlarida dunyoning 180 ta mamlakatidan 8,5 mingdan ortiq mutaxassis va ekspert ishtirok etmoqda.
