Koreyaga ish va o‘qishga yuborish bilan bog‘liq firibgarlik holatlari aniqlandi
O‘zbekistoning bir necha hududlarida fuqarolarni Koreyaga ishga yoki o‘qishga yuborishni va’da qilib, ulardan minglab dollar olgan shaxslar qo‘lga olindi.
O‘zbekistonda fuqarolarni Koreya Respublikasiga ishga yoki o‘qishga yuborishni va’da qilib, pul olgan bir necha shaxslar firibgarlikda gumonlanib qo‘lga olindi. Bu haqda Bosh prokuratura huzuridagi Departament ma’lum qildi.
Qayd etilishicha, Buxoro viloyatida o‘tkazilgan tezkor tadbir davomida fuqaro N.J. Migratsiya agentligida ishlovchi tanishlari orqali bir fuqaroni Koreyaga yuborishini aytib, 7 ming AQSH dollarini olgan vaqtida ashyoviy dalillar bilan ushlangan.
Andijon viloyatida esa “N.K.” nodavlat ta’lim muassasasi rahbari S.E. yuqori lavozimlarda ishlovchi tanishlari orqali fuqaro O.A.ga 6 ming AQSH dollari va 3 million so‘m evaziga xorijiy davlatlarning bakalavr diplomi hamda Koreyaga ketish uchun ishchi viza olib berishini va’da qilgan. U ushbu mablag‘lardan 500 AQSH dollari va 3 million so‘mni olgan vaqtida qo‘lga olingan.
Dastlabki tekshiruvlarda S.E. yana 14 nafar fuqarodan Koreyaga ishchi viza olib berish va’dasi bilan jami 44,1 ming AQSH dollarini firibgarlik yo‘li bilan qo‘lga kiritgani aniqlangan.
Namangan viloyatida o‘tkazilgan tezkor tadbirda “G.V.” MChJ rahbari A.V. ikki nafar fuqaroni Koreyadagi oliy ta’lim muassasasining magistratura bosqichiga o‘qishga va ishga joylashtirishni va’da qilib, 11 ming AQSH dollarini olgan vaqtida ushlangan.
Surxondaryo viloyatida esa fuqaro F.R. fuqaro A.Q.ni 10 ming AQSH dollari evaziga Koreyaga ishga yuborishini aytib, ushbu mablag‘ hisobidan 5 ming AQSH dollari va 61 million so‘mni olgan vaqtida ashyoviy dalillar bilan qo‘lga olingan.
Mazkur holatlar yuzasidan Jinoyat kodeksining firibgarlik hamda pora berishga oid moddalari bilan jinoyat ishlari qo‘zg‘atilib, tergov harakatlari olib borilmoqda.
