Turkiyada 29 yoshli o‘zbekistonlik ayol o‘z joniga qasd qildi
O‘zbekiston Bosh konsulxonasi Turkiyadagi fojiali holat yuzasidan ma’lumot berdi.
O‘zbekistonning Istanbul shahridagi Bosh konsulxonasi ma’lumotiga ko‘ra, Turkiyada 29 yoshli o‘zbekistonlik ayol o‘z joniga qasd qilgan.
Qayd etilishicha, joriy yilning 29-may kuni ushbu holat yuzasidan konsulxonaga tegishli ma’lumot kelib tushgan. Hozirda Turkiyaning vakolatli huquq-tartibot organlari bilan hamkorlikda holatning barcha holatlari va tafsilotlarini aniqlash bo‘yicha barcha zarur ishlar olib borilmoqda. Marhumaning yaqin qarindoshlariga jasadni vatanga qaytarish hamda boshqa konsullik-huquqiy yordam ko‘rsatish choralari ko‘rilmoqda.
Eslatib o‘tamiz, may oyi boshida Turkiyaning Sakarya viloyatidagi alyuminiy zavodida yuz bergan baxtsiz hodisa oqibatida 54 yoshli O‘zbekiston fuqarosi vafot etgan edi. Mazkur holat yuzasidan ham Bosh konsulxona tomonidan mahalliy huquq-tartibot organlari va tibbiyot muassasalari bilan hamkorlikda zarur ishlar amalga oshirilib, marhumning jasadi O‘zbekistonga yuborilgan.
