Qurilishga ruxsat olish xarajatlari 2 barobargacha qisqartiriladi
Qurilish obyektlarini ulashda “1 ta ariza – 1 ta to‘lov” tamoyili joriy qilinadi.
Prezidentning “Qurilish sohasida natijaga asoslangan boshqaruvni joriy etish hamda sohada davlat xizmatlarini soddalashtirish chora-tadbirlari to‘g‘risida”gi farmoni qabul qilindi. Bu haqda Adliya vairligi xabar berdi.
Hujjatga muvofiq, 2026-yil 1-sentabrdan boshlab respublikaning barcha hududlarida qurilish sohasidagi qator davlat xizmatlari birlashtirilib, yagona davlat xizmati — arxitektura va shaharsozlik talablarini berish tizimi joriy etiladi.
Shuningdek, 2026-yil 1-iyuldan qurilish obyektlarini muhandislik-kommunikatsiya tarmoqlariga ulash “1 ta ariza – 1 ta to‘lov – barcha ulanish nuqtalari” tamoyili asosida amalga oshiriladi. Mazkur tartib tadbirkorlar uchun vaqt va mablag‘ sarfini sezilarli darajada kamaytirishga xizmat qiladi.
Farmonga ko‘ra, bino konstruksiyasi, mustahkamligi va yong‘in xavfsizligiga ta’sir qilmaydigan, shuningdek, quvvati va maqsadi o‘zgarmagan loyihalardagi ayrim rejalashtirish o‘zgarishlari uchun hujjatlarni hududiy kengashlar bilan qayta kelishish amaliyoti bekor qilinadi.
Qurilish sohasidagi davlat xizmatlarini ko‘rsatish jarayonida aniqlangan kamchiliklarni bartaraf etish uchun esa qo‘shimcha 5 ish kuni muddat beriladi.
Bundan tashqari, 2026-yil 1-sentabrdan qurilish obyektlari ustidan nazoratni kuchaytirish maqsadida videokuzatuv kameralaridan foydalanish amaliyoti keng joriy etiladi. Xususan, tadbirkorlar tomonidan quriladigan ko‘p qavatli uy-joylar, mehmonxona, turizm, savdo, sanoat hamda III va IV toifadagi ijtimoiy soha obyektlarida videokuzatuv kameralarini o‘rnatish majburiy bo‘ladi.
Shuningdek, budjet mablag‘lari hisobidan quriladigan va qiymati 3 milliard so‘mdan yuqori bo‘lgan obyektlarda ham videokuzatuv tizimlarini joriy etish nazarda tutilgan.
