Toshkentda O‘zbekiston harbiy san’ati tarixi davlat muzeyi tashkil etiladi
Muzey 3 ming yildan ortiq davlatchilik tarixi davomida shakllangan harbiy an’analar, sarkardalar mahorati, milliy Qurolli kuchlarning barpo etilishi va rivojlanish bosqichlarini keng yoritishga xizmat qiladi.
Vazirlar Mahkamasining 3-iyundagi qaroriga muvofiq, Qurolli kuchlar davlat muzeyi negizida O‘zbekiston harbiy san’ati tarixi davlat muzeyi tashkil etiladi.
Hujjatga ko‘ra, yangi muzey O‘zbekistonning 3 ming yildan ortiq davlatchilik tarixi davomida shakllangan harbiy an’analar, sarkardalar mahorati, milliy Qurolli kuchlarning barpo etilishi va rivojlanish bosqichlarini keng yoritishga xizmat qiladi.
Muzey shuningdek, mamlakatda harbiy sohada amalga oshirilayotgan islohotlarni keng jamoatchilikka, xususan yosh avlod va xalqaro auditoriyaga yetkazish maqsadida tashkil etilmoqda.
Loyihani amalga oshirishda Mudofaa vazirligi Madaniyat vazirligi, Madaniy meros agentligi, Fanlar akademiyasi Tarix instituti hamda O‘zbekiston Badiiy akademiyasi bilan hamkorlikda ish olib boradi. Ekspozitsiyalarni yaratishda yetakchi ijodkorlar va mutaxassislar jalb etiladi.
Qayd etilishicha, muzeyning me’moriy yechimi milliy uslub va an’analarga mos holda ishlab chiqiladi. Ekspozitsiyalar esa zamonaviy interaktiv texnologiyalar, innovatsion yondashuvlar va sun’iy intellekt imkoniyatlari asosida yaratiladi.
