Germaniyada o‘zbekistonliklar uchun noqonuniy Shengen vizalari olib berishda gumonlangan guruh fosh etildi

Germaniyada O‘zbekiston fuqarolari uchun noqonuniy ravishda Shengen vizalarini rasmiylashtirib berganlikda gumon qilinayotgan xalqaro guruhga qarshi keng ko‘lamli maxsus operatsiya o‘tkazildi. Bu haqda Die Zeit xabar berdi.

 

Ma’lum qilinishicha, tergov doirasida chet elliklarni noqonuniy olib kirish, mamlakatda noqonuniy yashashni tashkil etish, viza olishda firibgarlik hamda hujjatlarni qalbakilashtirish holatlari o‘rganilmoqda.

 

Tergov harakatlari doirasida Germaniyaning Hessen va Quyi Saksoniya federal yerlaridagi yettita manzilda tintuv o‘tkazilgan. Operatsiyaga qariyb 220 nafar federal politsiya xodimi jalb etilgan.

 

Prokuratura ma’lumotiga ko‘ra, tergov markazida asosan O‘zbekiston fuqarolaridan iborat bo‘lgan va xalqaro miqyosda faoliyat yuritgan guruh turibdi. 

 

Tintuvlar davomida 12 nafar gumonlanuvchi aniqlangan, shuningdek, Germaniyada noqonuniy yashayotgan yana 9 nafar shaxs tekshiruvga olingan.

 

Dastlabki ma’lumotlarga ko‘ra, gumonlanuvchilar Yevropada ish izlayotgan O‘zbekiston fuqarolari uchun qisqa muddatli Shengen vizalarini rasmiylashtirib bergan. Bunda davlat idoralariga yolg‘on ma’lumotlar taqdim etilgan va soxta hujjatlardan foydalanilgan.

 

Tergov materiallarida qayd etilishicha, Germaniyaga kirib kelgan ayrim shaxslarga keyinchalik qalbaki Yevropa Ittifoqi hujjatlari ham taqdim etilgan. Ushbu hujjatlar yordamida bank hisobvaraqlari ochilgan, mobil aloqa xizmatlari rasmiylashtirilgan hamda turli davlat idoralari va sug‘urta tizimlarida ro‘yxatdan o‘tish ishlari amalga oshirilgan.

 

Huquq-tartibot organlari hisob-kitoblariga ko‘ra, guruh kamida 76 nafar O‘zbekiston fuqarosi uchun viza rasmiylashtirgan bo‘lishi mumkin. Bir dona viza uchun 2 ming yevro, aviachipta uchun yana 2 ming yevro, qalbaki haydovchilik guvohnomasi uchun esa 400 yevro talab qilingani aytilmoqda.

 

Tintuvlar davomida turli Yevropa davlatlariga tegishli deb taxmin qilinayotgan soxta shaxsni tasdiqlovchi hujjatlar, haydovchilik guvohnomalari, 20 dan ortiq mobil telefon va ikkita noutbuk musodara qilingan. Shuningdek, bank, sug‘urta va ro‘yxatdan o‘tishga oid hujjatlar ham olib qo‘yilgan.

 

Ma’lum qilinishicha, tergov 2025-yil oktyabr oyida Pragadan Amsterdamga yo‘l olgan xalqaro avtobusda O‘zbekiston fuqarosining tekshirilishi ortidan boshlangan. Uning yuklari orasidan bir nechta soxta Latviya shaxsiy guvohnomalari va qalbaki Polsha haydovchilik guvohnomasi topilgach, tergovchilar ushbu sxema ortida turgan shaxslarni aniqlashga kirishgan.

 

Hozirda tergov harakatlari davom etmoqda. Germaniya prokuraturasi asosiy gumonlanuvchiga nisbatan qamoqqa olish ehtiyot chorasini qo‘llash masalasini ko‘rib chiqmoqda.