Nurota internat uyida 19 nafar parvarishlanuvchi o‘z oilasiga qaytarildi
Yaqinlari bilan aloqasi uzilgan 98 nafar parvarishlanuvchining oilaviy munosabatlari tiklandi.
Navoiy viloyatidagi Nurota “Muruvvat” nogironligi bo‘lgan shaxslar uchun erkaklar internat uyida ayni paytda 317 nafar fuqaro parvarishlanmoqda. Muassasada ularning munosib hayot kechirishi, salomatligini tiklashi va jamiyatga moslashuvi uchun zarur shart-sharoitlar yaratilgan. Bu haqda Ijtimoiy himoya agentligi xabar berdi.
Parvarishlanuvchilarning bo‘sh vaqtini mazmunli tashkil etish maqsadida 20 ga yaqin turli yo‘nalishdagi to‘garaklar faoliyat yuritmoqda. Shuningdek, “mehnat terapiyasi” dasturi doirasida ratan mahsulotlaridan stol-stullar tayyorlash, sovundan bezak gullar yasash, biogumus ishlab chiqarish, issiqxona va dala maydonlarida dehqonchilik bilan shug‘ullanish, chorva hamda parrandalarni parvarish qilish ishlari yo‘lga qo‘yilgan.
Muassasada nogironligi bo‘lgan shaxslarning ijtimoiylashuvi va oila bilan aloqalarini mustahkamlash masalasiga ham alohida e’tibor qaratilmoqda. Shu maqsadda ijtimoiy xodimlar tomonidan parvarishlanuvchilar va ularning yaqinlari o‘rtasida muntazam videosuhbatlar tashkil etilmoqda.
Amalga oshirilgan ishlar natijasida avval yaqinlari bilan aloqasi uzilgan 98 nafar parvarishlanuvchining qarindoshlari bilan oilaviy munosabatlari tiklangan. Shundan 19 nafari jamiyatga muvaffaqiyatli moslashtirilib, o‘z oilasi bag‘riga qaytarilgan.
Bundan tashqari, ruhiy holatida ijobiy o‘zgarishlar kuzatilgan va mehnat qobiliyati yuqori bo‘lgan 30 nafar parvarishlanuvchi mustaqil hayotga tayyorlash dasturiga jalb etilgan. Ular kuratorlar nazorati ostida o‘z-o‘ziga xizmat ko‘rsatish, moliyaviy savodxonlik hamda ijtimoiy hayot ko‘nikmalarini egallamoqda.
