O‘zbekiston Prezidenti bilan uchrashuv va kechki ovqat sabab Zelenskiyning xatini o‘qishga ulgurmadim — Putin
Rossiya prezidenti kecha Zelenskiyning murojaati bilan tanishganini ma’lum qilib, boshqa davlatlar muzokaralarda faqat kafil sifatida ishtirok etishi mumkinligini qayd etdi.
Vladimir Putin Ukraina Prezidenti Vladimir Zelenskiyning ochiq xati bilan tanishganini ma’lum qildi.
Rossiya OAVlari xabariga ko‘ra, bu haqda davlat rahbari Sankt-Peterburg xalqaro iqtisodiy forumi yalpi majlisida so‘zlagan nutqi davomida ma’lum qilgan.
Putinning aytishicha, Kreml matbuot kotibi Dmitriy Peskov unga mazkur maktubni avvalroq ko‘rsatgan, biroq ishchi uchrashuvlar va tadbirlar sabab uni batafsil ko‘rib chiqishga vaqt topa olmagan.
“Kecha matbuot kotibi menga bu xatni ko‘rsatdi. Biroq biz O‘zbekiston Prezidenti bilan ishchi uchrashuv va ishchi kechki ovqat o‘tkazdik. Shu sababli hujjatni ko‘rib chiqishga vaqt bo‘lmadi. Bugun ertalab esa u yana maktubni taqdim etdi va men u bilan tanishdim”, — degan Rossiya prezidenti.
Shuningdek, Putin Rossiya va Ukraina o‘rtasidagi mojaroni hal etish bo‘yicha asosiy qarorlar aynan ikki davlat tomonidan qabul qilinishi lozimligini ta’kidlagan. Uning qayd etishicha, boshqa mamlakatlar va xalqaro hamkorlar muzokaralar uchun zarur sharoit yaratishi hamda kafil sifatida ishtirok etishi mumkin.
“Tabiiyki, asosiy masalalar Rossiya va Ukraina o‘rtasida hal qilinishi kerak. AQSH va boshqa davlatlardagi hamkorlarimiz esa zarur sharoitlarni yaratishi hamda kafil sifatida harakat qilishi mumkin”, — deya ta'kidlagan Putin.
Eslatib o‘tamiz, 4-iyun kuni Vladimir Zelenskiy Vladimir Putinga yo‘llagan ochiq xatida shaxsiy uchrashuv o‘tkazish va tomonlar o‘rtasida sulhga erishish masalalarini muhokama qilishni taklif qilgan edi.
