O‘zbekiston Qahramoni Ibrohim G‘afurov vafot etdi
Ibrohim G‘afurov mumtoz adabiyot, folklor, adabiy tanqid va badiiy tarjima sohalarida samarali ijod qilgan.
Yozuvchi, adabiyotshunos, tarjimon va O‘zbekiston Qahramoni Ibrohim G‘afurov 88 yoshida vafot etdi. Bu haqda O‘zbekiston Yozuvchilar uyushmasi ma’lum qildi.
Ibrohim G‘afurov 1937 yil 27 dekabrda Toshkent shahrida hunarmand oilasida tavallud topgan. U o‘rta maktabni tugatgach, 1956–1961 yillarda O‘zbekiston Milliy universiteti filologiya fakultetida tahsil olgan.
Mehnat faoliyati davomida Davlat badiiy adabiyot nashriyotida kichik muharrir, tahririyat mudiri va bosh muharrir o‘rinbosari lavozimlarida ishlagan.
Shuningdek, 1982–1995 yillarda “O‘zbekiston adabiyoti va san’ati” gazetasida bosh muharrir o‘rinbosari sifatida faoliyat yuritgan.
Ibrohim G‘afurov mumtoz adabiyot, folklor, adabiy tanqid va badiiy tarjima sohalarida samarali ijod qilgan, ko‘plab yirik adabiy loyihalar va ko‘p jildli asarlarning nashr etilishiga munosib hissa qo‘shgan. 2021-yilda „Oʻzbekiston Qahramoni“ unvoni bilan taqdirlangan.
U 2025 yilda Ogahiy nomidagi Xalqaro badiiy tarjimonlik tanlovida jahon nasrini o‘zbek tiliga tarjima qilish yo‘nalishi bo‘yicha taqdirlangan.
Bundan tashqari, u 1995 yilda Milliy tiklanish demokratik partiyasi tashkil etilishida ishtirok etgan hamda keyinchalik partiya raisi va “Milliy tiklanish” gazetasi bosh muharriri lavozimlarida faoliyat olib borgan.
