“Prokuror” deb ko‘rsatilgan shaxs gaz “zapravka” direktori ekani aniqlandi
Ijtimoiy tarmoqlarda haydovchi bilan tortishib, o‘zini prokuror sifatida tanishtirgan shaxs ishtirokidagi video yuzasidan Bosh prokuratura rasmiy munosabat bildirdi.
Ijtimoiy tarmoqlarda tarqalgan videoda o‘zini prokuror sifatida tanishtirgan shaxs prokuratura organlarida xizmat qilmasligi ma’lum bo‘ldi. Bu haqda Bosh prokuratura rasmiy bayonot berdi.
Qayd etilishicha, o‘tkazilgan tekshiruv natijasida videoda aks etgan erkak prokuratura tizimi xodimi emasligi aniqlangan. Shu sababli uning prokuratura organlariga aloqadorligi haqidagi ma’lumotlar haqiqatga to‘g‘ri kelmasligi ta’kidlandi.
Bosh prokuratura ma’lumotiga ko‘ra, mazkur shaxs Toshkent viloyati Ohangaron tumanida joylashgan gaz to‘ldirish shoxobchalaridan birida direktor lavozimida faoliyat yuritishi aniqlangan.
Avvalroq ijtimoiy tarmoqlarda Damas haydovchisi va ikki erkak o‘rtasida yuzaga kelgan tortishuv aks etgan video tarqalgan edi. Unda avtomobilni xususiy hududdan olib chiqish masalasida bahs yuzaga kelgani qayd etilgan.
Hozircha mazkur holat yuzasidan shaxsga nisbatan ko‘rilgan choralar haqida rasmiy ma’lumot berilmagan.
