Surxondaryodagi Aleksandr Fedin barpo etgan bog‘ davlat muhofazasiga olinadi
Holat Ekologiya va iqlim o‘zgarishi milliy qo‘mitasi tomonidan alohida nazoratga olingan.
Ijtimoiy tarmoqlarda Surxondaryo viloyatida Aleksandr Fedin tomonidan barpo etilgan bog‘ taqdiri hamda uning salomatligi bilan bog‘liq holat yuzasidan xabarlar tarqaldi. Holat yuzasidan Ekologiya va iqlim o‘zgarishi milliy qo‘mitasi rasmiy munosabat bildirdi.
Ma’lum qilinishicha, holat O‘zbekiston Prezidenti administratsiyasi huzuridagi Ekologiya va iqlim o‘zgarishi milliy qo‘mitasi tomonidan alohida nazoratga olingan.
Hozirda Aleksandr Fedin Termiz shahridagi tez tibbiy yordam klinik shifoxonasiga joylashtirilgan bo‘lib, unga zarur tibbiy yordam ko‘rsatilmoqda.
Shuningdek, uni munosib yashash sharoitlari bilan ta’minlash va Qo‘mita huzuridagi O‘rmon xo‘jaligi agentligi tizimiga ishga joylashtirish bo‘yicha choralar ko‘rilayotgani bildirildi.
Rasmiy ma’lumotga ko‘ra, Fedinning mamlakat ekologiyasi va ko‘kalamzorlashtirish sohasiga qo‘shgan hissasi inobatga olinib, u barpo etgan bog‘ni saqlab qolish va rivojlantirishga qaratilgan hujjat tayyorlanmoqda.
Mazkur hududni jamoatchilik uchun ochiq ekologik park sifatida tashkil etish hamda uni Ekologiya va iqlim o‘zgarishi milliy qo‘mitasi tasarrufiga o‘tkazish rejalashtirilgan. Kelgusida park negizida jamoat bog‘i tashkil etilib, hududning noyob tabiiy merosini saqlash va boyitish choralari amalga oshiriladi.
Mas’ullar Aleksandr Fedinning taqdiriga befarq bo‘lmagan fuqarolarga minnatdorlik bildirdi.
