Toshkent bir uyni ikki kishiga sotgan aka-ukalar ushlandi
Sotuvchilar xaridordan 363 ming dollar avans olganiga qaramay, uy boshqa xaridorga sotilgan.
Toshkent shahrining Shayxontohur tumanida ko‘chmas mulk savdosi bilan bog‘liq firibgarlik holati fosh etildi. Mazkur holat yuzasidan huquqni muhofaza qiluvchi organlar tomonidan tergov harakatlari olib borilmoqda. Bu haqda Toshkent shahar IIBB ma'lum qildi.
Ma’lumotlarga ko‘ra, aka-uka bo‘lgan ikki fuqaro o‘zlariga tegishli uyni sotuvga qo‘ygan. Uchtepa tumanida yashovchi fuqaro mazkur uyga xaridor sifatida qiziqish bildirgan va tomonlar o‘rtasida uzoq davom etgan muzokaralardan so‘ng uy narxi 900 ming AQSH dollariga kelishilgan.
Kelishuvga ko‘ra, xaridor uy rasmiylashtirilgunga qadar 363 ming AQSH dollari miqdorida oldindan to‘lovni amalga oshirgan. Qolgan mablag‘ esa mulk huquqi rasmiylashtirilgach to‘lanishi kerak bo‘lgan.
Biroq sotuvchilar pul mablag‘larini olganidan so‘ng xaridor bilan aloqani to‘xtatgan. Fuqaro aldanganini anglab, ichki ishlar organlariga murojaat qilgan.
Tergov davomida sotuvchilar avans pulini olganiga qaramay, mazkur uyni boshqa shaxsga sotib yuborgani aniqlangan.
Mazkur holat yuzasidan 1986 va 1987-yillarda tug‘ilgan fuqarolarga nisbatan O‘zbekiston Respublikasi Jinoyat kodeksining 168-moddasi (firibgarlik) bilan jinoyat ishi qo‘zg‘atilgan. Hozirda tergov harakatlari davom ettirilmoqda.
