Aholi murojaatlari vaqtida ko‘rib chiqmagan 19 nafar amaldor ishdan olindi

Prezident Xalq qabulxonasi tomonidan vazirliklar, idoralar va hokimliklarning fuqarolar murojaatlari bilan ishlash faoliyati o‘rganildi. Natijada 41 ta vazirlik, idora va hokimlikda murojaatlarni ko‘rib chiqish muddatlari 1070 ta holatda buzilgani aniqlangan.

 

Ma’lum qilinishicha, o‘rganishlar Prezidentning 2026-yil 1-apreldagi PF–51-son farmoni ijrosi hamda aholi murojaatlarining o‘z vaqtida va sifatli ko‘rib chiqilishini ta’minlash maqsadida o‘tkazilgan.

 

Aniqlangan holatlar yuzasidan Prezident Xalq qabulxonasi tomonidan tegishli tashkilotlar rahbarlariga kamchiliklarni zudlik bilan bartaraf etish, mas’ul xodimlarni javobgarlikka tortish va bunday holatlarning takrorlanishiga yo‘l qo‘ymaslik bo‘yicha nazorat xatlari yuborilgan.

 

Tahlillarga ko‘ra, hisobot davrida murojaatlarni ko‘rib chiqish muddatlarini eng ko‘p buzgan tashkilotlar quyidagilar bo‘lgan:

 

• Andijon viloyati hokimligi — 137 ta holat;
• Kambag‘allikni qisqartirish va bandlik vazirligi — 107 ta holat;
• Surxondaryo viloyati hokimligi — 103 ta holat;
• Raqobatni rivojlantirish va iste’molchilar huquqlarini himoya qilish qo‘mitasi — 79 ta holat;
• O‘zbekiston mahallalari uyushmasi — 65 ta holat;
• Toshkent shahar hokimligi — 55 ta holat;
• Qashqadaryo viloyati hokimligi — 45 ta holat;
• Oila va xotin-qizlar qo‘mitasi — 45 ta holat;
• Namangan viloyati hokimligi — 44 ta holat.
  
  

Qayd etilishicha, aniqlangan kamchiliklar yuzasidan tashkilot va idoralarda ichki xizmat tekshiruvlari o‘tkazilgan. Natijada 36 nafar xodim intizomiy javobgarlikka tortilgan, 19 nafar xodim esa egallab turgan lavozimidan ozod etilgan.

Shuningdek, PF–51-son farmoni talablari asosida murojaatlarni ko‘rib chiqish muddatlarining buzilishiga yo‘l qo‘ygan hamda aniqlangan kamchiliklarni bartaraf etish bo‘yicha choralar ko‘rmagan 13 ta vazirlik va idoraga oid materiallar huquqiy baho berish uchun Bosh prokuraturaga taqdim etilgan.