Qashqadaryodagi 2,5 mlrd so‘mlik ko‘prik uch yil ichida yaroqsiz holga kelgani aytilmoqda
Ko‘prikdagi muammolar Qizil daryo o‘zanining cho‘kishi oqibatida yuzaga kelgan.
Qashqadaryo viloyatining Yakkabog‘ tumanida Xiyobon va Guliston mahallalarini bog‘lab turuvchi ko‘prik yaroqsiz holatga kelgan. Bu haqda Uzdiplomat xabar berdi.
Ma’lum qilinishicha, ko‘prik Qizil daryo o‘zanining cho‘kishi oqibatida xavfli holatga kelib qolgan. Hududda faoliyat yurituvchi jamoat faoli Elmurod Odilning ta’kidlashicha, inshoot hozirda xavfli holatga kelib qolgan.
Aholi vakillari mas’ul tashkilotlardan hududda zudlik bilan xavfsizlik choralarini ko‘rishni so‘ramoqda. Qayd etilishicha, mazkur ko‘prik qurilishi 2019-yilda boshlangan va 2022-yilda yakunlangan.
Murojaatchilar ko‘prikni milliardlab so‘m evaziga qurgan tashkilotlar tomonidan qanday kafolatlar berilgani, shuningdek, inshootni foydalanishga qabul qilgan mas’ullar nega vaziyat yuzasidan munosabat bildirmayotganiga aniqlik kiritilishini so‘ramoqda.
Ta’kidlanishicha, bu mazkur masala yuzasidan ilk murojaat emas. Aholi vakillari avval ham ko‘prikdagi muammolarni ko‘targan.
“Ko‘prikka faqat favqulodda holat yuz bersagina e’tibor qaratiladimi?” deya savol qo‘ymoqda murojaatchilar.
