Filippinda 8,1 magnitudali kuchli zilzila sodir bo'ldi, uch kishi halok bo'lgan
Zilziladan so'ng sunami haqida ogohlantirish e'lon qilindi.
Filippin janubidagi Mindanao oroli yaqinida 8,1 magnitudali kuchli zilzila sodir bo‘ldi. Tabiiy ofat oqibatida kamida uch kishi halok bo‘lgani, bir necha kishi jarohat olgani hamda ayrim hududlarda binolar zarar ko‘rgani ma’lum qilindi. Bu haqda Manila Times nashri xabar berdi.
Mahalliy seysmologiya xizmatlari ma’lumotiga ko‘ra, zilzila o‘chog‘i yer yuzasidan 10 kilometr chuqurlikda joylashgan. Yer silkinishi General Santos shahri yaqinida qayd etilgan bo‘lib, kuchli tebranishlar mintaqaning bir qator hududlarida sezilgan.
Zilziladan so‘ng Filippin Vulkanologiya va Seysmologiya instituti sunami xavfi yuzasidan ogohlantirish e’lon qilgan. Mutaxassislar ayrim qirg‘oq hududlarida to‘lqinlar balandligi odatiy darajadan bir metrdan yuqori bo‘lishi mumkinligini bildirgan.
Shu munosabat bilan Sarangani, Davao Occidental, Tavi-Tavi, Sulu, Basilan, Zamboanga del Sur, Zamboanga Sibugay, Sultan Kudarat va Janubiy Kotabato provinsiyalarining qirg‘oqbo‘yi hududlarida yashovchi aholiga balandroq joylarga evakuatsiya qilinish yoki quruqlik ichkarisiga ko‘chib o‘tish tavsiya etilgan.
