Alimentdan qarzdor erkakni topishga sobiq turmush o‘rtog‘i yordamlashdi
Uning qarzi 30 mln so‘mdan oshiq bo‘lgan va sud qarori bilan 15 sutkaga qamalgan.
Majburiy ijro byurosi Xorazm viloyati boshqarmasi qidiruv sho‘basi tomonidan qidiruvdagi shaxslar va mol-mulklarni aniqlash bo‘yicha tizimli ishlar olib borilmoqda.
Boshqarmaning tuman va shahar bo‘limlari tomonidan sud qarorlariga asosan qarzdor deb topilgan 288 nafar shaxsga nisbatan qidiruv e’lon qilingan.
Joriy yilning o‘tgan davrida, 96 nafar qidiruvdagi shaxslar topilib, keyingi ijro harakatlari amalga oshirilgan. Birgina, may oyida qidiruvdagi 8 nafar shaxslar topilib, davlat ijrochilari ixtiyoriga yuborilgan.
Jumladan, Fuqarolik ishlari bo‘yicha Bog‘ot tumanlararo sudining ijro hujjatiga asosan qarzdor S.O.dan undiruvchi R.M.ning foydasiga bir nafar farzandining moddiy ta’minoti uchun oylik ish haqi va boshqa daromadlarining 1/4 qismi miqdorida aliment undirish belgilangan.
Ijro hujjati Byuroning Tuproqqal’a tumani bo‘limi ish yurituviga kelib tushgan va ijro harakatlariga kirishilgan. Biroq qarzdorni yashash manzilidan topishning imkoni bo‘lmaganligi sababli qidiruv e’lon qilingan.
Shundan so‘ng, qarzdorning sobiq turmush o‘rtog‘i bilan bo‘lgan suhbatda, qarzdor yashab kelayotgan manzili haqida ma’lumotlar olingan va Qidiruv sho‘basi xodimlari tomonidan olib borilgan qidiruv tadbirlari natijasida, qarzdor Hazorasp tumanidagi sha’riy nikohidagi turmush o‘rtog‘ining xonadonidan topilgan.
Uning alimentdan qarzi 34,4 mln so‘m ekanligi aniqlangan. Qarzdor S.O.ga nisbatan O‘zbekiston Respublikasi MJtKning 47⁴-moddasi bilan ma’muriy bayonnoma rasmiylashtirilib, sudga oshirilgan. Jinoyat ishlari bo‘yicha Tuproqqa’la tumani sudining qaroriga asosan qarzdor S.O.ga nisbatan 15 sutka ma’muriy qamoq jazosi tayinlandi.
