Farg‘onada 376 mln so‘mlik dori vositalari yoqib yo‘q qilindi
Ma’lum bo‘lishicha, ular respublika hududiga qonunga zid ravishda olib kirilgan va tekshiruvdan o‘tmagan.
Majburiy ijro byurosining Farg‘ona viloyati Toshloq tuman bo‘limi tomonidan sud hujjati ijrosini ta’minlash doirasida navbatdagi ijro harakatlari amalga oshirildi.
Jinoyat ishlari bo‘yicha Toshloq tuman sudining 2026 yil 16 apreldagi qaroriga asosan U.D.dan ashyoviy dalil sifatida olingan hamda tekshiruvdan qolgan tibbiy dori vositalarini yo‘q qilish haqidagi ijro hujjati bo‘lim ish yurituviga kelib tushib, belgilangan tartibda ijroga qabul qilindi.
Ijro hujjatiga muvofiq, 9 qutidagi 40 ta ampula “Omnadren-250” dori vositasi hamda jami 184 turdagi turli xil tibbiy preparatlarni yo‘q qilish bo‘yicha majburiy ijro harakatlari tayinlandi.
Belgilangan tartibda hamkor tashkilotlar va mas’ul saqlovchi ishtirokida Toshloq tumanida joylashgan markaziy utilizatsiya maydonida maxsus yoqish usuli orqali umumiy qiymati 376 million 500 ming 71 so‘m bo‘lgan dori vositalari to‘liq yo‘q qilindi.
Shu tariqa, sud hujjatining ijrosi amalda ta’minlanib, ijro ishi qonun talablariga muvofiq tamomlandi.
