Navoiyda Tico va yuk mashinasi to‘qnashib, bir kishi halok bo‘ldi
Tico haydovchisi ikkinchi darajali yo‘ldan chiqib kelib, asosiy yo‘ldagi transport vositasiga yo‘l bermagani oqibatida YTH sodir bo‘lgan.
Navoiy viloyatining Nurota tumanida Tico va Sinotruk rusumli yuk mashinasi ishtirokida sodir bo‘lgan yo‘l-transport hodisasi oqibatida bir kishi vafot etdi. Bu haqda viloyat Yo‘l harakati xavfsizligi boshqarmasi ma’lum qildi.
Ma’lumotlarga ko‘ra, hodisa 3-iyun kuni soat 08:30 atrofida “Tinchlik” mahalla fuqarolar yig‘ini hududidan o‘tuvchi D-191 Qizilqum halqa avtomobil yo‘lining 86-kilometrida yuz bergan.
Aniqlanishicha, Tico haydovchisi ikkinchi darajali yo‘ldan chiqib kelib, asosiy yo‘ldagi transport vositasiga yo‘l bermagan va Sinotruk yuk mashinasi bilan to‘qnashgan. Oqibatda yengil avtomobil Sinotruk rusumli yuk mashinasi bilan to‘qnashgan.
YTH natijasida Tico haydovchisi og‘ir tan jarohatlari olib, tuman kasalxonasining jonlantirish bo‘limiga yotqizilgan. Biroq shifokorlar tomonidan ko‘rsatilgan tibbiy yordamga qaramay, uning hayotini saqlab qolishning imkoni bo‘lmagan.
Hodisadan so‘ng mahalla aholisi bilan uchrashuv o‘tkazilib, yo‘l harakati xavfsizligini ta’minlash masalalari muhokama qilindi.
Shuningdek, sayyor qabul davomida fuqarolar tomonidan bildirilgan yo‘l infratuzilmasini yaxshilashga oid takliflarni amalga oshirish yuzasidan mas’ullarga tegishli topshiriqlar berildi.
