Putinni hibsga olish orderini bergan prokuror ishdan olindi
Xalqaro Jinoyat Sudi prokurori jinsiy zo'ravonlikda ayblanmoqda.
Xalqaro Jinoyat Sudi (XJS) Rim Statutiga a’zo davlatlar Assambleyasi Byurosi qaroriga muvofiq, prokuror Karim Xon unga nisbatan ilgari surilgan jinsiy zo‘ravonlik ayblovlari bo‘yicha intizomiy ish yakuniy qarori qabul qilinmaguncha lavozimidan vaqtincha chetlashtirildi. Bu haqda sudning rasmiy bayonotida ma’lum qilindi.
Qaror darhol kuchga kirgan bo‘lib, mazkur holat bo‘yicha ish Ishtirokchi Davlatlar Assambleyasiga ko‘rib chiqish uchun yuborildi. Shuningdek, masalani muhokama qilish maqsadida yaqin fursatda maxsus sessiya chaqirilishi rejalashtirilgan.
Sud bayonotida qayd etilishicha, prokurorni lavozimidan chetlatish yakuniy hukm emas, balki vaqtinchalik choradir. Yakuniy qaror intizomiy ish bo‘yicha to‘liq tekshiruv yakunlangach qabul qilinadi.
Mazkur qaror BMT Ichki nazorat organi tomonidan o‘tkazilgan tergov hisobotlari, mavjud dalillar hamda ekspert xulosalari asosida qabul qilingan.
Eslatib o‘tamiz, Karim Xon 2023-yilda Rossiya prezidenti Vladimir Putin va bolalar huquqlari bo‘yicha vakil Mariya Lvova-Belova ustidan hibsga olish orderini bergan edi. Keyinchalik Rossiya Tergov qo‘mitasi unga nisbatan jinoyat ishi qo‘zg‘atgan.
