Qo‘ng‘irotda MIB tadbirkorning 2,3 mlrd so‘m qarzini undirdi
Tashkilotning 4 ta mashinasi va 1 ta ko‘chmas mulkiga taqiq o‘rnatilgach, MCHJ qarzni to‘lashga majbur bo‘lgan.
Nukus tumanlararo iqtisodiy sudining 2026-yil 13-aprel kungi ijro xujjatiga asosan, qarzdor “KUGRAD LESTORG” MCHJdan undiruvchi “SIRDARYO FRESH TREADING” MCHJ foydasiga 2 mlrd 326 mln so‘m undirish belgilangan.
Ushbu ijro hujjati Majburiy ijro byurosi Qo‘ng‘irot tuman bo‘limi ish yurituviga kelib tushib, bo‘lim xodimlari tomonidan ijro harakatlariga kirishilgan.
Xususan, qarzdor "Kungrad Lestorg" MCHJning bank hisob raqamlari xatlovga olinib, unga elektron inkasso qo‘yilgan, shuningdek qarzdorga tegishli jami 4 ta avtotransport vositalari va 1 ta ko‘chmas mulkiga taqiq o‘rnatilgan.
Shuning natijasida, 2,3 mlrd so‘mdan ortiq pul mablag‘lari joriy yilning 21-may kuni to‘lig‘i bilan undirilib, undiruvchi "SIRDARYO FRESH TREADING" MCHJning hisob raqamiga o‘tkazib berilib, sud qarori ijrosi amalda ta’minlangan.
