Samarqandda MIB orqali qidiruvdagi mashina topildi
Fuqari bankdan qarzini to‘lamay, egaligidagi avtomashinani yashirib kelgan.
Majburiy ijro byurosi viloyat boshqarmasi ish yurituviga Fuqarolik ishlari bo‘yicha Payariq tumanlararo sudining ijro varaqasiga asosan qarzdor fuqaroga nisbatan ijro hujjati kelib tushgan.
Mazkur hujjatga muvofiq, undiruvchi bank foydasiga 330 million so‘m miqdoridagi qarz undirish belgilangan.
Qarzdor tomonidan belgilangan ixtiyoriy muddat mobaynida ijro hujjati talablari bajarilmagani tufayli, amaldagi qonunchilikka asosan, unga tegishli bo‘lgan “Tracker 2” rusumli avtotransport vositasiga qidiruv e’lon qilindi.
Shundan so‘ng, boshqarmaning qidiruv sho‘basi xodimlari tomonidan amalga oshirilgan tezkor harakatlar natijasida qarzdorga tegishli ushbu avtotransport vositasi yaqinlariga tegishli dala hovliga yashirib qo‘yilganligi aniqlandi.
Hozirda ushbu transport vositasi belgilangan tartibda vaqtincha saqlash uchun jarima maydoniga joylashtirildi va ijro hujjati ijrosini ta’minlash bo‘yicha belgilangan tartibdagi harakatlar davom ettirilmoqda.
