Sudyalar uchun mol-mulk va daromadlarni deklaratsiya qilish tizimi joriy etiladi

 

Prezidentning 9-iyundagi farmoniga muvofiq, O‘zbekistonda sudyalar, sud apparati xodimlari hamda ularning oila a’zolari — turmush o‘rtog‘i va voyaga yetmagan farzandlarining daromadlari, mol-mulki va manfaatlar to‘qnashuvi holatlarini deklaratsiya qilish tizimi bosqichma-bosqich yo‘lga qo‘yiladi.

 

Hujjatga ko‘ra, sud apparati faoliyatida korrupsiyaning oldini olish, manfaatlar to‘qnashuvini aniqlash va bartaraf etish maqsadida Komplayens nazorat xizmatlari tashkil etiladi. Ushbu tuzilmalar sud apparatidagi korrupsiyaviy xavf-xatarlarni baholash, xodimlarning kasb etikasi va qonunchilik talablariga rioya etishini monitoring qilish hamda ishga qabul qilish jarayonlarining shaffofligini ta’minlash bilan shug‘ullanadi.

 

Shuningdek, Komplayens nazorat xizmatlari sud apparati xodimlari va ularning oila a’zolari daromadlari hamda mol-mulki to‘g‘risidagi deklaratsiyalarni yuritish, manfaatlar to‘qnashuvi holatlarini nazorat qilish, mahalliychilik va urug‘-aymoqchilikka qarshi kurashish vazifalarini ham bajaradi.

 

Farmonga muvofiq, Sudyalar oliy kengashi 2026-yil 1-sentabrga qadar sudyalar tomonidan daromadlar, mol-mulk va manfaatlar to‘qnashuvi haqidagi ma’lumotlarni topshirish, tekshirish hamda tahlil qilishga mo‘ljallangan avtomatlashtirilgan elektron tizimni ishga tushiradi.

 

Bundan tashqari, Oliy sud 2027-yil 1-mayga qadar sud apparati xodimlari uchun shunday elektron deklaratsiya tizimini joriy etadi.

 

Hujjatda korrupsiya haqida xabar bergan xodimlarni xalqaro standartlar asosida himoya qilish va rag‘batlantirish, shuningdek, fuqarolar uchun xavfsiz aloqa kanallarini yaratish ham nazarda tutilgan.

 

Shuningdek, Oliy sud apparatida Oliy sud raisiga bevosita bo‘ysunuvchi Komplayens nazorat xizmati tashkil etiladi. Hududiy sudlarda esa korrupsiyaga qarshi nazoratni amalga oshiruvchi maxsus inspektor lavozimlari joriy qilinadi.