Toshkentda ota 260 mln alimentni oldindan to‘lab berdi
Erkak farzandlarining 18 yoshga to‘lguniga qadar bo‘lgan aliment majburiyatlarini muddatidan oldin bajarish istagini bildirgan.
MIBning Yangihayot tuman bo‘limi ish yurituvida bo‘lgan aliment undirish haqidagi ijro hujjati ijrosi ta’minlandi.
Ijro hujjatlariga muvofiq, qarzdor fuqaro 4 nafar farzandi ta’minoti uchun aliment to‘lab kelgan bo‘lib, u shu kunga qadar to‘lovlarni har oy belgilangan muddatlarda amalga oshirib kelgan.
Keyinchalik qarzdor sobiq turmush o‘rtog‘i bilan o‘zaro kelishuvga erishib, farzandlarining 18 yoshga to‘lguniga qadar bo‘lgan aliment majburiyatlarini muddatidan oldin bajarish istagini bildirgan. Shunga ko‘ra, davlat ijrochisi tomonidan qonunchilik talablari asosida hisob-kitoblar amalga oshirildi.
Hisob-kitoblarga ko‘ra, 4 nafar farzandning voyaga yetguniga qadar bo‘lgan davr uchun jami 265 million 907 ming so‘m aliment mablag‘i belgilangan.
Natijada qarzdor tomonidan joriy yilning 8 iyun kuni mazkur mablag‘ to‘liq to‘lanib, undiruvchiga o‘tkazildi. Shu tariqa, 4 nafar farzandning kelgusidagi ta’minoti uchun mo‘ljallangan aliment mablag‘i oldindan qoplandi hamda ijro hujjati amalda bajarilganligi sababli tamomlandi.
