Xitoyda xalqaro seminar: Tajriba almashinuvi va yangi hamkorliklar
Pekinda O‘zbekiston va Xitoy hamkorligida tibbiyot hamda farmatsevtika yo‘nalishlariga bag‘ishlangan 15 kunlik xalqaro seminar tashkil etildi.
O‘zbekistonning Xitoy Xalq Respublikasidagi elchixonasi ko‘magida hamda Tibbiyot va farmatsevtika tarmog‘ini rivojlantirish agentligi tashabbusi bilan Pekin shahrida tibbiyot va farmatsevtika yo‘nalishlariga bag‘ishlangan 15 kunlik xalqaro seminar tashkil etildi. Unda Milliy biofarmatsevtika ilmiy-tadqiqot instituti vakillari ham faol ishtirok etdi.
Seminar davomida ishtirokchilar Xitoyning tibbiyot, farmatsevtika va an’anaviy tabobat sohalaridagi ilg‘or tajribalari bilan yaqindan tanishib, yetakchi mutaxassislar ishtirokidagi ilmiy-amaliy uchrashuvlar va muloqotlarda qatnashdilar.
Xususan, Milliy biofarmatsevtika ilmiy-tadqiqot instituti vakillari Pekindagi qator ilmiy markazlar, tibbiyot muassasalari va farmatsevtika tashkilotlari faoliyati bilan tanishib, ilmiy hamkorlik istiqbollari yuzasidan muzokaralar olib bordilar.
Tadbir doirasida Xitoy xalq tabobati yo‘nalishidagi zamonaviy tibbiyot muassasalari faoliyati o‘rganildi. Shuningdek, o‘zaro hamkorlikni kengaytirish, tajriba almashish hamda istiqboldagi qo‘shma loyihalarni amalga oshirish masalalari muhokama qilinib, hamkorlik memorandumini imzolash bo‘yicha dastlabki kelishuvlarga erishildi.
Mazkur seminar natijalari Milliy biofarmatsevtika ilmiy-tadqiqot institutining xalqaro aloqalarini kengaytirish, ilmiy salohiyatini yanada mustahkamlash hamda tibbiyot va farmatsevtika sohalarida yangi hamkorlik yo‘nalishlarini rivojlantirishga xizmat qiladi.
