Afg‘onistondagi namoyishda 2 ayol halok bo‘ldi

 
Afg‘onistonda islomiy kiyinish qoidalarini buzganlikda ayblangan ayollarning hibsga olinishiga qarshi norozilik namoyishi bo‘lib o‘tdi. Unda 2 kishi vafot etdi. Ammo Tolibon rasmiylari buni tasdiqlamadi. Bu haqida BBC xabar berdi.

 
Voqea Afg‘onistonning g‘arbiy Hirot shahrida sodir bo‘lgan. Tolibon politsiyasi ushbu harakatlarni “xavfsizlikni ta’minlash va jamoat tartibini saqlash uchun ko‘rilgan choralar” deb atab, norozilik namoyishida o‘q uzilganini tan olgan.

 
Nashrning ta’kidlashicha politsiya namoyishni tarqatish uchun qanday choralar ko‘rgani noma’lum. Ammo guvohlar xavfsizlik kuchlari tayoq, qamchi va o‘qotar qurollardan foydalanganini aytishgan.

 
Hirot politsiya qo‘mondonligi vakili Sayid Mas’ud Husayniy holatga izoh berar ekan namoyishchilarni hijob o‘rashga qarshi chiqish bahonasida keskinlik yaratishga harakat qilishda ayblagan.

 
BMTning Afg‘onistondagi inson huquqlari bo‘yicha maxsus vakili Richard Bennet X’dagi sahifasida Hirotdagi namoyishchilarga keragidan ortiq kuch ishlatilganini aytib Tolibon hukumatini aybdorlarga chora ko‘rishga chaqirgan.

 
Tolibon 2021-yil Afg‘oniston hokimiyatiga kelganidan bir yil o‘tib, 2022-yil may oyidan boshlab ayollarga hijob o‘rashni majburiy qilgan edi.

 
Eslatib o‘tamiz, 2022-yilda Eronda 22 yoshli Mahsa Amini ro‘molni noto‘g‘ri o‘ragani uchun kaltaklab o‘ldirilgani katta namoyishga sabab bo‘lgan edi.