O'zbekistonda ekologlar va faollarning atrof-muhitni muhofaza qilishdagi hissasi e’tirof etildi
Zamon.uz bosh muharriri Farida Egamberdiyeva ham “Tabiat himoyachisi” ko‘krak nishoni bilan taqdirlandi.
Ekologiya va iqlim o‘zgarishi milliy qo‘mitasida Butunjahon atrof-muhit kuni munosabati bilan “Tabiat himoyachisi” ko‘krak nishonini topshirish marosimi bo‘lib o‘tdi.
Taqdirlash marosimida mukofotlarni O‘zbekiston Respublikasi Prezidentining ekologiya masalalari bo‘yicha maslahatchisi, Ekologiya va iqlim o‘zgarishi milliy qo‘mitasi raisi Aziz Abduhakimov topshirgan.
Tadbirda Qo‘mita markaziy apparati, tizim tashkilotlari va hududiy bo‘linmalarining faol xodimlari, hamkor tashkilotlar vakillari, ommaviy axborot vositalari xodimlari hamda ekologik faollar ishtirok etgan.
Marosim davomida so‘zga chiqqan Aziz Abduhakimov so‘nggi yillarda O‘zbekistonda ekologik xavfsizlik va atrof-muhitni muhofaza qilish davlat siyosatining ustuvor yo‘nalishlaridan biriga aylanganini ta’kidladi. Shuningdek, mamlakat ekologik muammolarni hal etishda xalqaro hamkorlikni kengaytirishga alohida e’tibor qaratayotgani qayd etilgan.
Ta’kidlanishicha, joriy yil 31-may – 6-iyun kunlari Samarqand shahrida Global ekologik fondning VIII Assambleyasi hamda “Eco Expo Central Asia 2026” xalqaro ko‘rgazmasining muvaffaqiyatli o‘tkazilgani O‘zbekistonning ekologik texnologiyalar, investitsiyalar va ilg‘or tajriba almashinuvidagi mavqeini yanada mustahkamlagan.
Qo‘mita raisi Butunjahon atrof-muhit kuni har bir insonning kelajak avlodlar oldidagi mas’uliyatini eslatib turuvchi muhim sana ekanini qayd etib, fuqarolarni ekologik tashabbuslarda faol ishtirok etishga chaqirgan.
Marosim yakunida “Tabiat himoyachisi” ko‘krak nishoni bilan Ekologiya qo‘mitasi tizimidagi xodimlar, hamkor tashkilotlar, ilmiy muassasalar, madaniyat va jamoat tashkilotlari vakillari, ekofaollar hamda OAV xodimlari taqdirlangan.
Ma’lum qilinishicha, 2026-yilda respublika bo‘ylab atrof-muhitni muhofaza qilish, ekologik madaniyatni rivojlantirish va barqaror rivojlanish g‘oyalarini targ‘ib etishga munosib hissa qo‘shgan jami 169 nafar fuqaro “Tabiat himoyachisi” ko‘krak nishoni bilan mukofotlangan.
