Pokiston Afg'onistonga qarshi yangi hujumlarni boshladi
Havo zarbalari oqibatida 13 kishi, jumladan 11 bola halok bo‘lgani bildirildi.
Afg‘oniston rasmiylari Pokistonni mamlakatning sharqiy hududlariga yangi havo hujumlari uyushtirishda aybladi. Afg‘oniston Oliy rahbari matbuot kotibi Zabihulloh Mujohidning ma’lum qilishicha, hujumlar oqibatida 13 kishi halok bo‘lgan, ulardan 11 nafari bolalardir.
Bildirilishicha, zarbalar Kunar, Xost va Paktika viloyatlaridagi tinch aholi yashash manzillariga berilgan. Hodisa oqibatida yana 14 kishi turli darajadagi tan jarohatlari olgan.
Zabihulloh Mujohid Pokiston armiyasini Afg‘oniston havo hududini buzishda ayblab, mazkur harakatni qoralagan. Uning ta’kidlashicha, hujumlar tinch aholiga qaratilgan bo‘lib, Afg‘oniston tomoni buni “gumanitar jinoyat” sifatida baholamoqda.
Shu bilan birga, Pokiston rasmiylari hozircha Afg‘oniston hududiga zarbalar berilgani yuzasidan rasmiy bayonot berganicha yo‘q.
Eslatib o‘tamiz, Afg‘oniston va Pokiston o‘rtasida chegara hududlarida bir necha bor qurolli to‘qnashuvlar kuzatilgan.
