Interpol qidiruvidagi o'zbekistonlik erkak Moldovadan ekstraditsiya qilindi
Erkak firibgarlik jinoyatini sodir etganlikda ayblanib, xalqaro qidiruvga berilgan.
Firibgarlik jinoyatini sodir etganlikda ayblanib, xalqaro qidiruvga berilgan O‘zbekiston fuqarosi Moldovadan O‘zbekistonga ekstraditsiya qilindi. Bu haqda IIV ma'lum qildi.
O‘zbekiston va Moldova Interpol Milliy markaziy byurolari o‘rtasidagi hamkorlik hamda muvofiqlashtirilgan tezkor-qidiruv tadbirlari natijasida qidiruvdagi shaxsning yashash manzili aniqlanib, u Kishinyov shahrida qo‘lga olingan.
Ma’lum qilinishicha, mazkur shaxsga nisbatan xalqaro qidiruv O‘zbekiston Interpol Milliy markaziy byurosi tomonidan Interpol kanallari orqali e’lon qilingan. Uni aniqlash va ushlash jarayonida ikki davlatning vakolatli tuzilmalari o‘rtasida muntazam axborot almashinuvi yo‘lga qo‘yilgan.
Ekstraditsiya bilan bog‘liq barcha huquqiy va protsessual jarayonlar yakunlangach, qidiruvdagi shaxs jinoiy javobgarlikka tortish uchun O‘zbekistonning vakolatli organlariga topshirilgan.
