"Ko'chaga qolishga tayyor bo'lsangiz, kredit oling" — Erkinjon Turdimov
Sirdaryo viloyati hokimi fuqarolar qabulida kredit olishda yordam so'rab kelgan onaxonga kredit olmaslikni tavsiya qildi.
Sirdaryo viloyati hokimi Erkinjon Turdimov fuqarolardan birining tomorqasiga suv chiqarish uchun 120 million so‘m kredit olish haqidagi murojaatiga munosabat bildirib, kredit olish masalasida ehtiyotkor bo‘lishga chaqirdi.
Hokimning ta’kidlashicha, dehqonchilik faoliyati yuqori tavakkal bilan bog‘liq bo‘lib, hosilning nobud bo‘lishi, tabiiy ofatlar, suv bosishi, zararkunandalar yoki boshqa kutilmagan holatlar kreditni o‘z vaqtida qaytarishni qiyinlashtirishi mumkin.
«Shunga tayyorman desangiz, bankka murojaat qilinglar. Ko‘chada qolishga tayyor bo‘lsangiz. Bo‘lmasa, kreditga murojaat qilmang», — degan viloyat hokimi.
“Ertaga kreditning foizini va asosiy qismini qaytara olmay qolsangiz, uyingizni sotib yuborib kreditni qaytarishga tayyormisiz? Ana shu savolni avvalo o‘zingizga bering”, — deya ta'kidlagan Erkinjon Turdimov.
Uning so‘zlariga ko‘ra, kredit bo‘yicha qarzdorlik ortib ketishi mol-mulkni sotishga majbur qilishi mumkin. Shu bois hokim fuqarolarni imkoniyatlarini puxta hisoblab, ortiqcha tavakkal qilmaslikka chaqirgan.
Shuningdek, hokim murojaatchining tomorqasiga suv chiqarish muammosini kredit hisobidan emas, balki hokimlik va mutasaddi tashkilotlar ko‘magida hal etish mumkinligini ma’lum qilgan. Suv chiqarish va yerga texnik yordam ko‘rsatish uchun tegishli xizmatlarga topshiriq berilishi aytilgan.
“Tomorqangizga suv chiqarib berishga, ishlatishga, hammasiga ko‘mak beriladi. Kredit olib o‘zingizni qiyin ahvolga solib qo‘ymang”, — deya qo‘shimcha qilgan hokim.
