O‘zbekistonda ish tashlashni amalga oshirish tartibi belgilandi
Endilikda jamoaviy mehnat nizosini yarashtirish yo‘li bilan hal etishning imkoni bo‘lmasa, mehnat jamoasi ish tashlash to‘g‘risida qaror qabul qilishi mumkin.
O‘zbekistonda jamoaviy mehnat nizolari yuzaga kelgan hollarda ish tashlashni tashkil etish tartibi qonun bilan belgilandi. Bu haqda “Huquqiy axborot” Telegram-kanali xabar berdi.
Prezident tomonidan imzolangan “Ayrim qonun hujjatlariga o‘zgartirish va qo‘shimchalar kiritish to‘g‘risida”gi qonunga (O‘RQ–1150-son, 2026-yil 11-iyun) muvofiq, agar jamoaviy mehnat nizosini yarashtirish tartib-taomillari orqali hal etishning imkoni bo‘lmasa, mehnat jamoasi ish tashlash to‘g‘risida qaror qabul qilishi mumkin.
Qonunga ko‘ra, ish tashlashda qatnashish ixtiyoriy hisoblanadi. Hech kim ish tashlashda qatnashishga yoki undan bosh tortishga majburlanishi mumkin emas.
Ish tashlashni e’lon qilish haqidagi qaror tashkilot xodimlarining umumiy yig‘ilishida ishtirok etayotgan xodimlarning 50 foizidan ko‘prog‘i tomonidan ma’qullangan taqdirda qabul qilinadi. Bunday qaror ish tashlash boshlanishidan kamida bir oy oldin qabul qilinishi lozim.
Shuningdek, kasaba uyushmasi qo‘mitasi ish tashlash e’lon qilingani haqida ish beruvchini qaror qabul qilingan paytdan boshlab bir ish kunidan kechiktirmay yozma ravishda xabardor qilishi kerak.
O‘z navbatida, ish beruvchi bo‘lajak ish tashlash to‘g‘risidagi yozma bildirishnomani olganidan keyin bir ish kuni ichida jamoaviy mehnat nizolarini tartibga solish bo‘yicha vakolatli davlat organlarini yozma ravishda ogohlantiradi.
Mazkur qonun rasmiy e’lon qilingan kundan e’tiboran uch oy o‘tgach kuchga kiradi.
