Qashqadaryodagi xususiy bolalar bog'chasida uch yoshli bola vafot etdi
Bola muassasa xodimlarining e’tiborsizligi oqibatida xizmat avtomobilida qolib ketib vafot etgan.
Qashqadaryo viloyatining Qamashi tumanida joylashgan xususiy maktabgacha ta’lim tashkilotida 3 yoshli tarbiyalanuvchining vafoti bilan bog‘liq fojiali holat yuz berdi.
Maktabgacha va maktab ta’limi vazirligi matbuot xizmatining ma’lumotiga ko‘ra, voqea joriy yil 4-iyun kuni “Zafar” mahalla fuqarolar yig‘ini hududida faoliyat yuritgan yakka tartibdagi tadbirkor O.A.ga tegishli xususiy bog‘chada sodir bo‘lgan.
Ma’lum qilinishicha, muassasaga olib ketilayotgan tarbiyalanuvchilardan biri transport vositasida unutib qoldirilgan. Bolalar bog‘chasi xodimlarining beparvoligi va mas’uliyatsizligi oqibatida bola avtomobil ichida qolib ketgan va vafot etgan.
Ta’kidlanishicha, muassasa mas’ullari bolalarni transportda tashish jarayonida xavfsizlik qoidalari va talablariga qat’iy rioya etish bo‘yicha tegishli organlar tomonidan bir necha bor ogohlantirilgan bo‘lishiga qaramay, belgilangan tartiblarga amal qilinmagan.
Mazkur holat yuzasidan huquqni muhofaza qiluvchi organlar tomonidan jinoyat ishi qo‘zg‘atilib, tergov harakatlari olib borilmoqda. Shuningdek, yakka tartibdagi tadbirkor O.A. bilan tuzilgan shartnoma bekor qilingan.
