TIV O‘zbekiston terma jamoasi futbolchilari tekshirilgani yuzasidan AQSHdan rasmiy izoh so‘radi
Tashqi ishlar vazirligi sport tadbirlarida xavfsizlik choralari o‘zaro hurmat va do‘stona munosabatlarga putur yetkazmasligi lozimligini ta’kidladi.
AQSHning Nyu York shahrida O‘zbekiston va Niderlandiya terma jamoalari o‘rtasidagi o‘rtoqlik uchrashuvi oldidan O‘zbekiston milliy terma jamoasi futbolchilari hamda murabbiylar shtabi a’zolari qat’iy xavfsizlik tekshiruvidan o‘tkazilgani yuzasidan O‘zbekiston Tashqi ishlar vazirligi tegishli choralarni ko‘rgan.
TIV matbuot kotibi Omonulla Fayziyevning Zamon.uz'ga ma’lum qilishicha, mazkur holat yuzasidan O‘zbekistonning Nyu Yorkdagi Bosh konsulxonasi orqali AQSHning vakolatli idoralari bilan aloqa o‘rnatilib, vaziyat bo‘yicha rasmiy tushuntirish so‘ralgan.
Qayd etilishicha, har bir davlat o‘z hududida xavfsizlik choralarini milliy qonunchilik va ichki tartib-qoidalar asosida amalga oshirish huquqiga ega. Shu bilan birga, bunday jarayonlar xalqaro sport musobaqalarining asosiy tamoyillari bo‘lgan o‘zaro hurmat, tenglik va do‘stona munosabatlarga salbiy ta’sir ko‘rsatmasligi muhim ekani ta’kidlangan.
Avvalroq ijtimoiy tarmoqlarda 8-iyun kuni bo‘lib o‘tgan uchrashuv arafasida O‘zbekiston terma jamoasi futbolchilari qo‘l metallodetektorlari yordamida tekshirilgani aks etgan videolar tarqalgan edi. Kadrlarda xavfsizlik xodimlari futbolchilar va murabbiylardan sumkalar hamda sport anjomlarini yerga qo‘yishni so‘ragani, hududda xizmat iti bilan kinolog va boshqa xavfsizlik xodimlari faoliyat olib borgani ko‘ringan.
