Toshkentda Chirchiq daryosi qirg‘og‘ining bir qismi o‘pirildi
Hodisa oqibatida yaqin atrofdagi bino va inshootlar, boshqa obyektlar hamda aholi xonadonlariga zarar yetmagan.
Toshkent shahrining Bektemir tumanida joylashgan Chirchiq daryosi qirg‘og‘ida qisman o‘pirilish holati yuz berdi. Bu haqda Toshkent shahar hokimligi xabar berdi.
Ma'lum qilinishicha, hodisa 11-iyun kuni soat 14:00 atrofida Bektemir tumani "Nurafshon" MFY hududidan oqib o‘tuvchi Chirchiq daryosining suv inshooti (vodopad) yaqinidagi o‘ng qirg‘oq beton qoplamasida kuzatilgan.
Hodisa joyiga Toshkent shahar hokimligi, Toshkent shahar Favqulodda vaziyatlar bosh boshqarmasi hamda boshqa mas’ul xizmatlar xodimlari yetib borib, vaziyatni bartaraf etish bo‘yicha tezkor choralarni ko‘rmoqda.
Shuningdek, qirg‘oqni mustahkamlash ishlarini muvofiqlashtirish maqsadida idoralararo maxsus shtab tashkil etilgan.
Rasmiy ma’lumotga ko‘ra, hodisa oqibatida yaqin atrofdagi bino va inshootlar, boshqa obyektlar hamda aholi xonadonlariga zarar yetmagan. Hozirda fuqarolar uchun hech qanday xavf mavjud emas.
Toshkent shahar hokimligi va mas’ul idoralar vaziyat to‘liq nazorat ostida ekanini ma’lum qildi.
