Turkiyada “Tungi muzeylar” loyihasining uchinchi mavsumi boshlandi
2026-yil 1-iyundan 1-oktyabrgacha mamlakat bo‘ylab Nemrutdan Efesgacha, Zeugmadan Galata minorasigacha bo‘lgan 20 ta muzey va tarixiy obidalar soat 19:00 dan boshlab, belgilangan tungi yopilish vaqtigacha ziyoratchilar uchun ochiq bo‘ladi.
Turkiyaning boy madaniy merosini odatiy tashrif soatlaridan tashqarida ham ommaga taqdim etish hamda tarixiy maskanlarni o‘zgacha muhitda kashf etish maqsadida yo‘lga qo‘yilgan “Tungi muzeylar” loyihasining uchinchi mavsumi rasman boshlandi.
2026-yil 1-iyundan 1-oktyabrgacha mamlakat bo‘ylab Nemrutdan Efesgacha, Zeugmadan Galata minorasigacha bo‘lgan 20 ta muzey va tarixiy obidalar soat 19:00 dan boshlab, belgilangan tungi yopilish vaqtigacha ziyoratchilar uchun ochiq bo‘ladi.
Ushbu loyiha Turkiyaning madaniy turizm salohiyatini yanada boyitish bilan birga, tarixiy merosni asrashga ham muhim hissa qo‘shmoqda. Sayyohlar oqimining kun davomida yanada muvozanatli taqsimlanishi tarixiy maskanlardagi gavjumlikni kamaytirib, obidalarni xotirjam va qulay sharoitda tomosha qilishga yordam beradi. Muzeylarning ish vaqti uzaytirilgani esa sayyohlarni mamlakatda ko‘proq vaqt o‘tkazishga va Turkiyaning bebaho madaniy boyliklarini shoshilmasdan, yanada chuqurroq his etishiga zamin yaratadi. Shu tariqa, tarix bilan uchrashuv oddiy ekskursiyadan ko‘ra mazmunli va esda qolarli taassurotga aylanadi.
Istanbul tungi muzeylari
Turkiyaning madaniy poytaxti Istanbulda “Tungi muzeylar” loyihasi doirasida Arxeologiya muzeylari, Galata minorasi hamda Turk va islom san’ati muzeyi bu yoz sayyohlarni ajoyib madaniy sayohatga chorlaydi.
Istanbul Arxeologiya muzeylari dunyodagi eng qadimiy tinchlik shartnomasi hamda insoniyat tarixidagi eng qadimgi sevgi she’rlaridan birini o‘zida saqlab kelayotgani bilan alohida ahamiyatga ega. Galata minorasidan namoyon bo‘ladigan Istanbulning tungi chiroqlari va Oltin Shox qo‘ltig‘ining betakror manzarasi tashrif buyuruvchilarni o‘ziga maftun etadi. Turk va islom san’ati muzeyining boy kolleksiyalari esa ziyoratchilarni asrlar qa’riga olib kirib, turk va islom sivilizatsiyasining nodir merosi bilan tanishtiradi.
Egey osmoni ostidagi antik tarix sirlari
Efes dunyoda eng yaxshi saqlanib qolgan Rim shaharlaridan biridir. U yerdagi ulug‘vor tarixiy obidalar tun sokinligida yanada jozibali ko‘rinadi.
Egey mintaqasida tun qorong‘usida ham o‘z jozibasini saqlab qoladigan yana bir qator tarixiy maskanlar mavjud. Ular orasida Denizlidagi Hiyerapolis qadimiy shahri hamda Aydindagi Didim Apollon ibodatxonasi alohida ajralib turadi. Afsonaviy Pergamon asoschisi Telefosning rafiqasi Iyera nomi bilan bog‘liq Hiyerapolis teatri, qadimiy ko‘chalari va oppoq travertenlari bilan tunning sokin muhitida yanada maftunkor tus oladi.
Qadimgi dunyoning eng yirik ibodatxonalaridan biri bo‘lgan va ion uslubida bunyod etilgan Didim Apollon ibodatxonasi esa nafis ustunlari hamda ulug‘vor me’morchiligi bilan tashrif buyuruvchilarda katta taassurot qoldiradi.
Turk Riviyerasi merosi
Turk Riviyerasining yuragi Antaliya quyoshli iqlimi, musaffo moviy suvlari va boy tarixiy merosi bilan ajralib turadi. Likya, Pamfiliya va Pisidiya kabi qadimiy sivilizatsiyalar izlarini o‘zida mujassam etgan shahar mintaqaning eng jozibador madaniy yo‘nalishlaridan biri hisoblanadi.
Aspendos, Patara va Side kabi qadimiy shaharlar tungi yoritish ostida yanada o‘ziga xos qiyofa kasb etadi. Ulkan Rim amfiteatri bilan mashhur Aspendos, dunyodagi ilk demokratik yig‘ilish binosi va qayta tiklangan mayoqi bilan tanilgan Patara hamda dengiz bo‘yidagi Apollon ibodatxonasi bilan mashhur Side kechasi ham sayyohlarni o‘ziga rom etadi.
Bundan tashqari, Alanya va Likya sivilizatsiyalari muzeylarining kechki soatlarda faoliyat yuritishi mehmonlarga Turkiyaning boy tarixiy merosi bilan yanada yaqindan tanishish imkonini beradi.
Onado‘li durdonalari
Turkiyaning “Tungi muzeylar” loyihasi doirasida Onado‘li bo‘ylab joylashgan ko‘plab tarixiy maskanlar ham sayyohlar e’tiborini tortmoqda. Adiyamandagi ulkan qadimiy xudo haykallari bilan mashhur Nemrut tog‘i, Bitlisdagi Ahlat qabrtoshlari hamda Kapadokiyadagi Derinkuyu yerosti shahri tungi yoritishda yanada sirli ko‘rinish kasb etadi. Ushbu qadimiy yerosti majmuasi ilk nasroniylar uchun muhim boshpana vazifasini bajargan.
Shuningdek, poytaxt Anqaradagi Onado‘li sivilizatsiyalari muzeyi, Gaziantepdagi Zeugma mozaika muzeyi hamda Shanliurfadagi Arxeologiya muzeyi va Haleplibahche mozaika muzeyi ham kechki soatlarda mehmonlarni qabul qilib, o‘zining noyob kolleksiyalari orqali tarixning boy qatlamlarini namoyish etmoqda.
